zindagi

tamtamā.e hue aariz pe ye ashkoñ kī qatār

mujh se is darja ḳhafā aap se itnī bezār

maiñ ne kab terī mohabbat se kiyā hai inkār

mujh ko ik lamha kabhī chain bhī aayā tujh bin

ishq hī ek haqīqat to nahīñ hai lekin

zindagī sirf mohabbat to nahīñ hai anjum

soch duniyā se alag bhaag ke jā.eñge kahāñ

apnī jannat bhī basā.eñ to basā.eñge kahāñ

amn is ālam-e-afkār meñ pā.eñge kahāñ

phir zamāne se nigāhoñ kā churānā kaisā

ishq kī zid meñ farā.ez ko bhulānā kaisā

zindagī sirf mohabbat to nahīñ hai anjum

tīr-e-iflās se kitnoñ ke kaleje haiñ figār

kitne sīnoñ meñ hai ghuTtī huī aahoñ kā ġhubār

kitne chehre nazar aate haiñ tabassum kā mazār

ik nazar bhuul ke us samt bhī dekhā hotā

kuchh mohabbat ke sivā aur bhī sochā hotā

zindagī sirf mohabbat to nahīñ hai anjum

rañj-e-ġhurbat ke sivā jabr ke pahlū bhī to haiñ

jo Tapakte nahīñ āñkhoñ se vo aañsū bhī to haiñ

zaḳhm khaa.e hue mazdūr ke baazū bhī to haiñ

ḳhaak aur ḳhuun meñ ġhaltāñ haiñ nazāre kitne

qalb-e-insāñ meñ dahakte haiñ sharāre kitne

zindagī sirf mohabbat to nahīñ hai anjum

arsa-e-dahr pe sarmāya o mehnat kī ye jañg

amn o tahzīb ke ruḳhsār se uḌtā huā rañg

ye hukūmat ye ġhulāmī ye baġhāvat kī umañg

qalb-e-ādam ke ye riste hue kohna nāsūr

apne ehsās se hai fitrat-e-insāñ majbūr

zindagī sirf mohabbat to nahīñ hai anjum

aap ko band ġhulāmī se chhuḌānā hai hameñ

ḳhud mohabbat ko bhī āzād banānā hai hameñ

ik na.ī tarz pe duniyā ko sajānā hai hameñ

tū bhī aa vaqt ke siine meñ sharārā ban jā

tū bhī ab arsh-e-baġhāvat kā sitārā ban jā

zindagī sirf mohabbat to nahīñ hai anjum

tamtamae hue aariz pe ye ashkon ki qatar

mujh se is darja KHafa aap se itni bezar

main ne kab teri mohabbat se kiya hai inkar

mujh ko ek lamha kabhi chain bhi aaya tujh bin

ishq hi ek haqiqat to nahin hai lekin

zindagi sirf mohabbat to nahin hai anjum

soch duniya se alag bhag ke jaenge kahan

apni jannat bhi basaen to basaenge kahan

amn is aalam-e-afkar mein paenge kahan

phir zamane se nigahon ka churana kaisa

ishq ki zid mein faraez ko bhulana kaisa

zindagi sirf mohabbat to nahin hai anjum

tir-e-iflas se kitnon ke kaleje hain figar

kitne sinon mein hai ghuTti hui aahon ka ghubar

kitne chehre nazar aate hain tabassum ka mazar

ek nazar bhul ke us samt bhi dekha hota

kuchh mohabbat ke siwa aur bhi socha hota

zindagi sirf mohabbat to nahin hai anjum

ranj-e-ghurbat ke siwa jabr ke pahlu bhi to hain

jo Tapakte nahin aankhon se wo aansu bhi to hain

zaKHm khae hue mazdur ke bazu bhi to hain

KHak aur KHun mein ghaltan hain nazare kitne

qalb-e-insan mein dahakte hain sharare kitne

zindagi sirf mohabbat to nahin hai anjum

arsa-e-dahr pe sarmaya o mehnat ki ye jang

amn o tahzib ke ruKHsar se uDta hua rang

ye hukumat ye ghulami ye baghawat ki umang

qalb-e-adam ke ye riste hue kohna nasur

apne ehsas se hai fitrat-e-insan majbur

zindagi sirf mohabbat to nahin hai anjum

aap ko band ghulami se chhuDana hai hamein

KHud mohabbat ko bhi aazad banana hai hamein

ek nai tarz pe duniya ko sajaana hai hamein

tu bhi aa waqt ke sine mein sharara ban ja

tu bhi ab arsh-e-baghawat ka sitara ban ja

zindagi sirf mohabbat to nahin hai anjum