zindagi KHwab mein runuma hone wala koi hadisa to nahin

zindagī ḳhvāb meñ rūnumā hone vaalā koī

hādisa to nahīñ hai

ki jis ke na hone aur hone kā ehsās bhī

sub.h kī dhuup meñ kumhlā jaa.e

phir us ke hone kī koī aziyyat

na us ke na hone kā dukh

apne chehre kī gahrī lakīroñ meñ

ik tajrabe kā nishān ban ke zinda rahe

zindagī ḳhvāb meñ rūnumā hone vaalā

koī hādisa to nahīñ hai

jo socho to hai

aur na socho nahīñ hai

zindagī aa.ina hai

ki jaise hī ham ko

koī lamha chhū ke guzar jaatā hai

lams kī gahrī hiddat se

vo lamha

chehre par apne nishān chhoḌ jaatā hai

lamhe guzarte haiñ

chehre pe bhī lams ke ye nishāñ baḌhte jaate haiñ

ik vaqt aatā hai

vo saare lamhe

jo dar-asl sab sānahe haiñ

jo ham par guzarte haiñ

ā.īne pe naqsh ho jaate haiñ

aur ā.īne meñ

jhurriyoñ ke sivā

kuchh nazar tak bhī aatā nahīñ

zindagī ḳhvāb meñ rūnumā hone vaalā koī

hādisa to nahīñ hai

ki jis ke na hone aur hone kā ehsās bhī

sub.h tak na rahe

zindagi KHwab mein runuma hone wala koi

hadisa to nahin hai

ki jis ke na hone aur hone ka ehsas bhi

subh ki dhup mein kumhla jae

phir us ke hone ki koi aziyyat

na us ke na hone ka dukh

apne chehre ki gahri lakiron mein

ek tajrabe ka nishan ban ke zinda rahe

zindagi KHwab mein runuma hone wala

koi hadisa to nahin hai

jo socho to hai

aur na socho nahin hai

zindagi aaina hai

ki jaise hi hum ko

koi lamha chhu ke guzar jata hai

lams ki gahri hiddat se

wo lamha

chehre par apne nishan chhoD jata hai

lamhe guzarte hain

chehre pe bhi lams ke ye nishan baDhte jate hain

ek waqt aata hai

wo sare lamhe

jo dar-asl sab sanahe hain

jo hum par guzarte hain

aaine pe naqsh ho jate hain

aur aaine mein

jhurriyon ke siwa

kuchh nazar tak bhi aata nahin

zindagi KHwab mein runuma hone wala koi

hadisa to nahin hai

ki jis ke na hone aur hone ka ehsas bhi

subh tak na rahe