zindagi

zamīñ ghūmtī jā rahī hai

āsmāñ badaltā jā rahā hai

rang-e-shafaq rang-e-hinā rang-e-lahū

sab ek jaise ho ga.e haiñ

duniyā ke ek kone se dūsre kone tak

lahū kī bārish ho rahī hai

ujaḌte ghar uchhalte sar

umaDte aañsū ubalte naale

be-gor-o-kafan lāsheñ

suunī māñgeñ ujaḌtī kokheñ

kahīñ amal kahīñ radd-e-amal

ye hangāma ai ḳhudā kyā hai

terī ḳhūbsūrat kā.enāt ko

āḳhir kis kī nazar lagī hai

ye aag kab bujhegī

ye raqs-e-junūñ kab tak rahegā

mere mālik

apnī dānish-varī ke zo'm meñ bahakte achchhe logoñ ko

aur un se nabard-āzmā nek bandoñ ko

amn kī sīdhī raah batā

un ko dil ke daaġh dikhā

jiine kā andāz sikhā

zamin ghumti ja rahi hai

aasman badalta ja raha hai

rang-e-shafaq rang-e-hina rang-e-lahu

sab ek jaise ho gae hain

duniya ke ek kone se dusre kone tak

lahu ki barish ho rahi hai

ujaDte ghar uchhalte sar

umaDte aansu ubalte nale

be-gor-o-kafan lashen

suni mangen ujaDti kokhen

kahin amal kahin radd-e-amal

ye hangama ai KHuda kya hai

teri KHubsurat kaenat ko

aaKHir kis ki nazar lagi hai

ye aag kab bujhegi

ye raqs-e-junun kab tak rahega

mere malik

apni danish-wari ke zo'm mein bahakte achchhe logon ko

aur un se nabard-azma nek bandon ko

amn ki sidhi rah bata

un ko dil ke dagh dikha

jine ka andaz sikha