zindagi

zindagī kī jeb meñ chand

khanakte sikke haiñ jin se vo

mere liye ḳhushī nahīñ ḳharīd

saktī zindagī mere kandhe se

haath laTkā.ī huī mujhe dilāse

de rahī hai magar vo mere

chehre par muskurāhaT laane meñ

nākām hai vo ab merī muskurātī

huī shakl kī painting banānā

chāhtī hai lekin muskurāhaT

canvas se bahut duur kā mu'āmla hai

har sub.h jab sūraj raat ke

tavīl safar ke baa'd logoñ ko

ye batāne mashriq se tulū' hotā hai

ke muskurāhaToñ bharī zindagī kā

ek aur din tumheñ mubārak

tab zindagī mere gaal par bosa

de kar nikal paḌtī hai merī

khoī huī muskurāhaT kī talāsh meñ

din-bhar kī mehnat ke baa'd

chand khanakte sikkoñ se ḳhushiyāñ

aur muskurāhaTeñ nahīñ ḳharīdī jā saktīñ

zindagī terā shukriya

zindagi ki jeb mein chand

khanakte sikke hain jin se wo

mere liye KHushi nahin KHarid

sakti zindagi mere kandhe se

hath laTkai hui mujhe dilase

de rahi hai magar wo mere

chehre par muskurahaT lane mein

nakaam hai wo ab meri muskuraati

hui shakl ki painting banana

chahti hai lekin muskurahaT

canwas se bahut dur ka mu'amla hai

har subh jab suraj raat ke

tawil safar ke ba'd logon ko

ye batane mashriq se tulu' hota hai

ke muskurahaTon bhari zindagi ka

ek aur din tumhein mubarak

tab zindagi mere gal par bosa

de kar nikal paDti hai meri

khoi hui muskurahaT ki talash mein

din-bhar ki mehnat ke ba'd

chand khanakte sikkon se KHushiyan

aur muskurahaTen nahin KHaridi ja saktin

zindagi tera shukriya