zindagi

zindagī

mahaz sāñsoñ kā joḌ hī nahīñ

lamhoñ kā khel bhī hai

lamhoñ ke andar ka.ī ka.ī lamhe

kuchh ḳhāmosh bolte hue lamhe

kuchh muntashir kuchh muntazir lamhe

lamhoñ ke andar aur bhī ka.ī ka.ī lamhe

kuchh maḳhsūs lamhāt ḳhaas auqāt

kuchh zehn meñ Thahre hue

kuchh haath kī rekhāoñ meñ chhupe hue

ka.ī yādeñ bāteñ mulāqāteñ

haañ mulāqāteñ un moḌoñ se

jahāñ se khulte haiñ

aur bhī ka.ī ka.ī moḌ

maqām pe pahuñchne ke pahle

thak jaate haiñ ka.ī ka.ī moḌ

TuuT jaate haiñ ka.ī ka.ī moḌ

chhūT jaate haiñ ka.ī ka.ī moḌ

vo thake hue moḌ

vo TuuTe hue moḌ

vo chhūTe hue moḌ

simaT jaate haiñ lamhāt meñ auqāt meñ

zehn meñ kahīñ Thahar jaane ko

aur maqām

maqām kabhī miltā bhī hai kyā

koī raah kisī maqām pe pahuñchtī bhī hai kyā

bas rah jaate haiñ lamhe kahīñ zehn meñ

zindagī mahaz sāñsoñ kā joḌ hī nahīñ

lamhoñ kā khel bhī hai

zindagi

mahaz sanson ka joD hi nahin

lamhon ka khel bhi hai

lamhon ke andar kai kai lamhe

kuchh KHamosh bolte hue lamhe

kuchh muntashir kuchh muntazir lamhe

lamhon ke andar aur bhi kai kai lamhe

kuchh maKHsus lamhat KHas auqat

kuchh zehn mein Thahre hue

kuchh hath ki rekhaon mein chhupe hue

kai yaaden baaten mulaqaten

han mulaqaten un moDon se

jahan se khulte hain

aur bhi kai kai moD

maqam pe pahunchne ke pahle

thak jate hain kai kai moD

TuT jate hain kai kai moD

chhuT jate hain kai kai moD

wo thake hue moD

wo TuTe hue moD

wo chhuTe hue moD

simaT jate hain lamhat mein auqat mein

zehn mein kahin Thahar jaane ko

aur maqam

maqam kabhi milta bhi hai kya

koi rah kisi maqam pe pahunchti bhi hai kya

bas rah jate hain lamhe kahin zehn mein

zindagi mahaz sanson ka joD hi nahin

lamhon ka khel bhi hai