آنکھیں چوندھیائی نہیں اور نہ جھلسے پاؤں

بانٹ گئی دیوار جو وہی دے گئی چھاؤں

ننھے بالک جیسا من میں رہتا ہے سنتاپ

جاگے تو شیطان بہت ہے سوئے تو نشپاپ

ندیا سوکھی دویش کی پریت کرے بدلاؤ

آر مل گیا پار سے ختم ہوا الگاؤ

کب تک ڈھوتی یاد کی تصویروں کا بھار

اتنی کیلیں ٹھوک دیں ٹوٹ گئی دیوار

جیسا اس کا کرودھ ہے ویسا اس کا پیار

الگ الگ ہوتی نہیں دو دھاری تلوار

دھیان رکھے چنتا کرے یہ ہے اس کی ریت

ناری کے سنواد کو سمجھ نہ لینا پریت

کان اگر ہے تیری میری سماعتوں کا ساز

ویرانے میں پیڑ گرے تو ہوگی کیا آواز

سورج جب سر پر چڑھے دھوپ پسارے پاؤں

لوٹ آتی ہے جسم میں سہم کے میری چھاؤں

یادیں تری نہ کٹ سکیں کاٹ دئے ناخون

بھینچ بھینچ کر مٹھیاں آنے لگا تھا خون