طلب کریں تو یہ آنکھیں بھی ان کو دے دوں میں

مگر یہ لوگ ان آنکھوں کے خواب مانگتے ہیں

بہت عزیز تھی یہ زندگی مگر ہم لوگ

کبھی کبھی تو کسی آرزو میں مر بھی گئے

میں جو چپ تھا ہمہ تن گوش تھی بستی ساری

اب مرے منہ میں زباں ہے کوئی سنتا ہی نہیں

ایک ناتواں رشتہ اس سے اب بھی باقی ہے

جس طرح دعاؤں کا اور اثر کا رشتہ ہے

عجیب طرفہ تماشا ہے میرے عہد کے لوگ

سوال کرنے سے پہلے جواب مانگتے ہیں

وحشت کے اس نگر میں وہ قوس قزح سے لوگ

جانے کہاں سے آئے تھے جانے کدھر گئے

خوف ایسا ہے کہ دنیا کے ستائے ہوئے لوگ

کبھی منبر کبھی محراب سے ڈر جاتے ہیں

تمام عمر کی بے تابیوں کا حاصل تھا

وہ ایک لمحہ جو صدیوں کے پیش و پس میں رہا

کیا کروں خلعت و دستار کی خواہش کہ مجھے

زیست کرنے کا سلیقہ بھی زیاں سے آیا

وہ حبس تھا کہ ترستی تھی سانس لینے کو

سو روح تازہ ہوئی جسم سے نکلتے ہی