sunā ye hai banā karte haiñ joḌe āsmānoñ par

to ye samjheñ ki har biivī balā-e-āsmānī hai

suna ye hai bana karte hain joDe aasmanon par

to ye samjhen ki har biwi bala-e-asmani hai

alfāz kī adā.egī tarz-e-bayān siikh

karnā agar hai ishq to urdu zabān siikh

alfaz ki adaegi tarz-e-bayan sikh

karna agar hai ishq to urdu zaban sikh

do sagī bahnoñ kī do gañjoñ se shādī ho ga.ī

aur ye be-zulf bhī ham-zulf kahlāne lage

do sagi bahnon ki do ganjon se shadi ho gai

aur ye be-zulf bhi ham-zulf kahlane lage

professor ye urdu ke jo urdu se kamāte haiñ

isī paise se bachchoñ ko ye añgrezī paḌhāte haiñ

professor ye urdu ke jo urdu se kamate hain

isi paise se bachchon ko ye angrezi paDhate hain

dil ko kisī kī yaad se ḳhālī na kījiye

aaseb rahne lagte haiñ ḳhālī makān meñ

dil ko kisi ki yaad se KHali na kijiye

aaseb rahne lagte hain KHali makan mein

kareñge āñkh-maTakkā vo kyā paḌosan se

jo log apnī hī biivī ko Dar ke dekhte haiñ

karenge aankh-maTakka wo kya paDosan se

jo log apni hi biwi ko Dar ke dekhte hain

nuqsān ho rahā hai bahut kārobār meñ

abbā paḌe haiñ jab se paḌosan ke pyaar meñ

nuqsan ho raha hai bahut karobar mein

abba paDe hain jab se paDosan ke pyar mein

is se pahle udhār tū māñge

maiñ tirā shahr chhoḌ jā.ūñgā

is se pahle udhaar tu mange

main tera shahr chhoD jaunga

mohabbatoñ meñ to kuchh bhī patā nahīñ lagtā

bahut burā hai vo phir bhī burā nahīñ lagtā

mohabbaton mein to kuchh bhi pata nahin lagta

bahut bura hai wo phir bhi bura nahin lagta

sau koshishoñ se aa.e the chañdiyā pe chaar baal

do aarzū meñ kaT ga.e do intizār meñ

sau koshishon se aae the chandiya pe chaar baal

do aarzu mein kaT gae do intizar mein

jab se makāñ badal ga.iiñ donoñ paḌosaneñ

lagtā nahīñ hai jī mirā ujḌe dayār meñ

jab se makan badal gain donon paDosanen

lagta nahin hai ji mera ujDe dayar mein

ga.e zamāne kī bāteñ haiñ shakl aur sūrat

bas ab to ahl-e-nazar ḳham kamar ke dekhte haiñ

gae zamane ki baaten hain shakl aur surat

bas ab to ahl-e-nazar KHam kamar ke dekhte hain

ḳhudā kā shukr hai chakkar ka.ī se haiñ apne

bas ek biivī pe dār-o-madār thoḌī hai

KHuda ka shukr hai chakkar kai se hain apne

bas ek biwi pe dar-o-madar thoDi hai

ta'alluqāt bhī resham kī tarah hote haiñ

ulajh ga.e to sirā umr bhar nahīñ miltā

ta'alluqat bhi resham ki tarah hote hain

ulajh gae to sira umr bhar nahin milta

maiñ hī tum ko phūTī aañkh nahīñ bhātī

tum ne sab se pyaar ke pech laḌā.e haiñ

main hi tum ko phuTi aankh nahin bhati

tum ne sab se pyar ke pech laDae hain