sab rāhoñ meñ kāñTe haiñ

chalte jaanā ek taraf

sab rahon mein kanTe hain

chalte jaana ek taraf

qaid hone ke liye aa to gayā huuñ lekin

qaid ho jā.ūñ to hargiz na rihā.ī denā

qaid hone ke liye aa to gaya hun lekin

qaid ho jaun to hargiz na rihai dena

unheñ kyā pata mushk-o-'ambar hai kyā shai

jo vāqif nahīñ merī urdu zabāñ se

unhen kya pata mushk-o-'ambar hai kya shai

jo waqif nahin meri urdu zaban se

jab se tū markazī ḳhayāl huī

kuchh tabī'at mirī bahāl huī

jab se tu markazi KHayal hui

kuchh tabi'at meri bahaal hui

isī liye to maiñ āñkheñ jhukā.e rahtā huuñ

tirī shabīh na aa.e ḳharāb āñkhoñ meñ

isi liye to main aankhen jhukae rahta hun

teri shabih na aae KHarab aankhon mein

vo ab aate nahīñ dariyā kināre

utarte the jo gahre pāniyoñ meñ

wo ab aate nahin dariya kinare

utarte the jo gahre paniyon mein

ek se phirte haiñ dīvāne jidhar bhī dekho

ab koī farq nahīñ shahr meñ vīrāne meñ

ek se phirte hain diwane jidhar bhi dekho

ab koi farq nahin shahr mein virane mein

maiñ apne talḳh masā.il meñ kho gayā thā kahīñ

ki aaj raat ko phir us ko ḳhvāb meñ dekhā

main apne talKH masail mein kho gaya tha kahin

ki aaj raat ko phir us ko KHwab mein dekha

sūrateñ TūTeñgī lekin aa.ina rah jā.egā

aa.ina gar TuuT jā.egā to kyā rah jā.egā

suraten TuTengi lekin aaina rah jaega

aaina gar TuT jaega to kya rah jaega

dil-sahrā meñ ret sadā uḌtī rahtī hai

kab is se tā'mīr koī darpan kartā hai

dil-sahra mein ret sada uDti rahti hai

kab is se ta'mir koi darpan karta hai

TuuTe hue diloñ kī sadā ho gayā huuñ maiñ

ik haq thā dostī kā adā ho gayā huuñ maiñ

TuTe hue dilon ki sada ho gaya hun main

ek haq tha dosti ka ada ho gaya hun main

vo to patthar hai sar se paañv talak

vo mirī bandagī ko kyā jaane

wo to patthar hai sar se panw talak

wo meri bandagi ko kya jaane

agar mujh ko chhū le vo jān-e-bahār

to dast-e-ḳhizāñ se nikal jā.ūñgā

agar mujh ko chhu le wo jaan-e-bahaar

to dast-e-KHizan se nikal jaunga

sair-e-sāhil ko bahut aate haiñ ujle chehre

tum bhī aa niklo kabhī aa ke ye manzar dekho

sair-e-sahil ko bahut aate hain ujle chehre

tum bhi aa niklo kabhi aa ke ye manzar dekho

pattharoñ par naqsh kartā huuñ maiñ harf-e-īn-o-āñ

kyā pata miT jā.egā yā kuchh banā rah jā.egā

pattharon par naqsh karta hun main harf-e-in-o-an

kya pata miT jaega ya kuchh bana rah jaega