zaḳhm itne haiñ badan par ki kahīñ dard nahīñ

ham bhī pathrāv meñ patthar ke hue jaate haiñ

zaKHm itne hain badan par ki kahin dard nahin

hum bhi pathraw mein patthar ke hue jate hain

kab se maiñ safar meñ huuñ magar ye nahīñ ma.alūm

aane meñ lagā huuñ ki maiñ jaane meñ lagā huuñ

kab se main safar mein hun magar ye nahin malum

aane mein laga hun ki main jaane mein laga hun

ye na dekho ki mire zaḳhm bahut kaarī haiñ

ye batāo ki mirā dushman-e-jāñ kaisā hai

ye na dekho ki mere zaKHm bahut kari hain

ye batao ki mera dushman-e-jaan kaisa hai

suntā hai yahāñ kaun samajhtā hai yahāñ kaun

ye shaġhl-e-suḳhan vaqt-guzārī ke liye hai

sunta hai yahan kaun samajhta hai yahan kaun

ye shaghl-e-suKHan waqt-guzari ke liye hai

koī tasvīr banā le ki tujhe yaad raheñ

tez chaltī hai havā rañg uḌe jaate haiñ

koi taswir bana le ki tujhe yaad rahen

tez chalti hai hawa rang uDe jate hain

kisī sūrat ye nukta-chīniyāñ kuchh rañg to lā.īñ

chalo yuuñ hī sahī ab naam to mash.hūr hai merā

kisi surat ye nukta-chiniyan kuchh rang to lain

chalo yun hi sahi ab nam to mashhur hai mera

chāhe haiñ tamāshā mire andar ka.ī mausam

laao koī sahrā mirī vahshat ke barābar

chahe hain tamasha mere andar kai mausam

lao koi sahra meri wahshat ke barabar

kahāñ maiñ aur kahāñ gosha-nashīnī kā ye elaan

ye saarā silsila mash.hūr hone ke liye thā

kahan main aur kahan gosha-nashini ka ye elan

ye sara silsila mashhur hone ke liye tha

ye kyā kam hai amāma bāñdh kar nikle nahīñ ham

ab is se bhī sivā īmān-dārī kaun kartā

ye kya kam hai amama bandh kar nikle nahin hum

ab is se bhi siwa iman-dari kaun karta

the yahāñ saare amal radd-e-amal ke muhtāj

zindagī bhī hameñ darkār thī marne ke liye

the yahan sare amal radd-e-amal ke muhtaj

zindagi bhi hamein darkar thi marne ke liye

parda jo uThā diyā gayā hai

kyā thā ki chhupā diyā gayā hai

parda jo uTha diya gaya hai

kya tha ki chhupa diya gaya hai

kabhī na badle dil-e-bā-safā ke taur-tarīq

adū milā to use bhī salām karte rahe

kabhi na badle dil-e-ba-safa ke taur-tariq

adu mila to use bhi salam karte rahe

aanā zarā tafrīh rahegī

ik mahfil-e-sadmāt kareñge

aana zara tafrih rahegi

ek mahfil-e-sadmat karenge

charāġh un pe jale the bahut havā ke ḳhilāf

bujhe bujhe haiñ tabhī aaj bām-o-dar mere

charagh un pe jale the bahut hawa ke KHilaf

bujhe bujhe hain tabhi aaj baam-o-dar mere

usī ḳhātir haTā lī hai masā.il se tavajjoh

unheñ thoḌā sā maiñ gambhīr karnā chāhtā huuñ

usi KHatir haTa li hai masail se tawajjoh

unhen thoDa sa main gambhir karna chahta hun

gard kī tarah sar-e-rāhguzar baiThe haiñ

in dinoñ aur hī andāz-e-safar hai apnā

gard ki tarah sar-e-rahguzar baiThe hain

in dinon aur hi andaz-e-safar hai apna

jī-bhar ke sitāre jagmagā.eñ

mahtāb bujhā diyā gayā hai

ji-bhar ke sitare jagmagaen

mahtab bujha diya gaya hai

is ishq meñ na pūchho hāl-e-dil-e-darīda

tum ne sunā to hogā vo sher 'mus.hafī' kā

is ishq mein na puchho haal-e-dil-e-darida

tum ne suna to hoga wo sher 'mushafi' ka

kuchh der meñ ye dil kisī gintī meñ na hogā

betāb bahut rā.e-shumārī ke liye hai

kuchh der mein ye dil kisi ginti mein na hoga

betab bahut rae-shumari ke liye hai

kholīñ vo dar kisī ne bhī kholā na ho jise

koī jidhar na jaa.e udhar jaanā chāhiye

kholin wo dar kisi ne bhi khola na ho jise

koi jidhar na jae udhar jaana chahiye

saarī duniyā se alag vahshat-e-dil hai apnī

ye ki lagtī hai na ghar kī na bayābāñ vaalī

sari duniya se alag wahshat-e-dil hai apni

ye ki lagti hai na ghar ki na bayaban wali

ye kyā ki āshiqī meñ bhī fikr-e-ziyāñ rahe

dāman kā chaak tā-ba-jigar jaanā chāhiye

ye kya ki aashiqi mein bhi fikr-e-ziyan rahe

daman ka chaak ta-ba-jigar jaana chahiye

ham ki ik umr rahe ishva-e-duniyā ke asiir

muddatoñ ba.ad ye kam-zāt samajh meñ aa.ī

hum ki ek umr rahe ishwa-e-duniya ke asir

muddaton baad ye kam-zat samajh mein aai

taḳhlīq ḳhud kiyā thā kal apne meñ ek ghar

ab ghar se ḳhalq chand makīñ kar rahe haiñ ham

taKHliq KHud kiya tha kal apne mein ek ghar

ab ghar se KHalq chand makin kar rahe hain hum

ḳhud apnī zaat se ik muqtadī nikāltā huuñ

maiñ apnā shauq-e-imāmat yūñhī nikāltā huuñ

KHud apni zat se ek muqtadi nikalta hun

main apna shauq-e-imamat yunhi nikalta hun

ishq ik mashġhala-e-jāñ bhī to ho saktā hai

kyā zarūrī hai ki āzār kiyā jaa.e use

ishq ek mashghala-e-jaan bhi to ho sakta hai

kya zaruri hai ki aazar kiya jae use