musalsal sochte rahte haiñ tum ko

tumheñ jiine kī aadat ho ga.ī hai

musalsal sochte rahte hain tum ko

tumhein jine ki aadat ho gai hai

ab apnā intizār rahegā tamām-umr

ik shaḳhs thā jo mujh se judā kar gayā mujhe

ab apna intizar rahega tamam-umr

ek shaKHs tha jo mujh se juda kar gaya mujhe

so apne shahr ke raunaq kī ḳhair māñgnā tum

maiñ apne gaañv se ik shaam le ke aa rahā huuñ

so apne shahr ke raunaq ki KHair mangna tum

main apne ganw se ek sham le ke aa raha hun

kyā kahūñ kaifiyyat-e-dil kis qadar TuuTā huuñ maiñ

ab agar chāhā gayā to ret meñ mil jā.ūñgā

kya kahun kaifiyyat-e-dil kis qadar TuTa hun main

ab agar chaha gaya to ret mein mil jaunga

ek din us ko muñh lagāyā aur

aur cigarette chhoḌ dī maiñ ne

ek din us ko munh lagaya aur

aur cigarette chhoD di main ne

ai ashk na kar zulm zarā der Thahar jā

ik shaḳhs abhī merī nigāhoñ meñ basā hai

ai ashk na kar zulm zara der Thahar ja

ek shaKHs abhi meri nigahon mein basa hai

mujh ko thī mahfiloñ kī bahut aarzū magar

tanhā.iyoñ ke ḳhauf se tanhā rahā huuñ maiñ

mujh ko thi mahfilon ki bahut aarzu magar

tanhaiyon ke KHauf se tanha raha hun main

merī rātoñ se pare duur vo mahtāb sā jism

us ko sochūñ to mire ḳhvāb bhī jal jaate haiñ

meri raaton se pare dur wo mahtab sa jism

us ko sochun to mere KHwab bhi jal jate hain

ab ibādat meñ bhī aa jaate ho lab par mere

itnā paḌhtā huuñ tumheñ hijr ke lamhoñ meñ ki bas

ab ibaadat mein bhi aa jate ho lab par mere

itna paDhta hun tumhein hijr ke lamhon mein ki bas

kaun sā dard utar aayā hai tahrīroñ meñ

saare alfāz janāze kī tarah lagte haiñ

kaun sa dard utar aaya hai tahriron mein

sare alfaz janaze ki tarah lagte hain

tū tum samajhne lage hijr ke ma.ānī ko

tumhārī bhī koī shai tum se chhīn lī ga.ī kyā

tu tum samajhne lage hijr ke maani ko

tumhaari bhi koi shai tum se chhin li gai kya

vo shaḳhs yādoñ kā mujh ko ġhulām karte hue

gayā bhī to mirī nīndeñ harām karte hue

wo shaKHs yaadon ka mujh ko ghulam karte hue

gaya bhi to meri ninden haram karte hue

nahīñ hai zindagī tujh se koī bhī vāsta lekin

talāshegī to mil jā.ūñgā terī har kahānī meñ

nahin hai zindagi tujh se koi bhi wasta lekin

talashegi to mil jaunga teri har kahani mein

vo us nazar kā tasādum vo hoñT kī jumbish

tamām kar gayā mujh ko kalām karte hue

wo us nazar ka tasadum wo honT ki jumbish

tamam kar gaya mujh ko kalam karte hue

sar-e-mahfil vo phir se aa ga.e haiñ aaj be-parda

na jaane kaun sī shai phir mirī taqsīm honī hai

sar-e-mahfil wo phir se aa gae hain aaj be-parda

na jaane kaun si shai phir meri taqsim honi hai

hadd-e-nazar tak ek darīche se aaj phir

maiñ jā rahā thā aur koī dekhtā rahā

hadd-e-nazar tak ek dariche se aaj phir

main ja raha tha aur koi dekhta raha

merā suqrāt ko paḌhnā bhī qayāmat Thahrā

zahr de kar mire apnoñ ne mujhe maar diyā

mera suqraat ko paDhna bhi qayamat Thahra

zahr de kar mere apnon ne mujhe mar diya

dil kī lagī se jaan bhī chhūTī to yuuñ huā

vo shaḳhs zindagī ke taqāzoñ se mar gayā

dil ki lagi se jaan bhi chhuTi to yun hua

wo shaKHs zindagi ke taqazon se mar gaya

Darāte ho hameñ kyā shaiḳh tum roz-e-qayāmat se

dar-e-jānāñ pe ham ne hashr barpā ḳhuub dekhā hai

Daraate ho hamein kya shaiKH tum roz-e-qayamat se

dar-e-jaanan pe hum ne hashr barpa KHub dekha hai

laboñ ne us ke bhī gustāḳhiyāñ bahut kī haiñ

ye aur baat ki hoñToñ kī surḳhiyāñ na ga.iiñ

labon ne us ke bhi gustaKHiyan bahut ki hain

ye aur baat ki honTon ki surKHiyan na gain

ā.īna toḌ Daalā hai ab tere aks ko

tasvīr kar rahā huuñ tirī yaad joḌ kar

aaina toD Dala hai ab tere aks ko

taswir kar raha hun teri yaad joD kar

agar TūTūñ to merī kirchiyāñ maazī ko de denā

ki mustaqbil meñ phir merī na.ī tajsīm honī hai

agar TuTun to meri kirchiyan mazi ko de dena

ki mustaqbil mein phir meri nai tajsim honi hai

vasl ne to mujhe shiddat kī tapish meñ rakkhā

hijr thā jis ne mujhe sāya-e-dīvār diyā

wasl ne to mujhe shiddat ki tapish mein rakkha

hijr tha jis ne mujhe saya-e-diwar diya

pairāhan baaqī hai mere jism pe ab bhī ujlā sā

shāyad ishq mukammal nāzil honā ab bhī baaqī hai

pairahan baqi hai mere jism pe ab bhi ujla sa

shayad ishq mukammal nazil hona ab bhi baqi hai

kisī ke diid kā paiġhām le ke aa rahā huuñ

tavāf ke liye ehrām le ke aa rahā huuñ

kisi ke did ka paigham le ke aa raha hun

tawaf ke liye ehram le ke aa raha hun

us shaḳhs ko balā kī mohabbat thī mujh se dost

phir ek roz us ne irāda badal liyā

us shaKHs ko bala ki mohabbat thi mujh se dost

phir ek roz us ne irada badal liya

tez bārish meñ kahīñ duur saḌak par baiThe

ham tire chhoḌ ke jaane kā sabab sochte haiñ

tez barish mein kahin dur saDak par baiThe

hum tere chhoD ke jaane ka sabab sochte hain

ek hasrat ne hameñ rab kā muqarrab rakhā

ham agar 'ishq nahīñ karte to kāfir hote

ek hasrat ne hamein rab ka muqarrab rakha

hum agar 'ishq nahin karte to kafir hote

daar pe khīñchnā lāzim hai zamāne mujh ko

maiñ ne matrūk mohabbat ko jilā baḳhshī hai

dar pe khinchna lazim hai zamane mujh ko

main ne matruk mohabbat ko jila baKHshi hai