ek hī anjām hai ai dost husn o ishq kā

sham.a bhī bujhtī hai parvānoñ ke jal jaane ke ba.ad

ek hi anjam hai ai dost husn o ishq ka

shama bhi bujhti hai parwanon ke jal jaane ke baad

fareb-ḳhurda hai itnā ki mere dil ko abhī

tum aa chuke ho magar intizār baaqī hai

fareb-KHurda hai itna ki mere dil ko abhi

tum aa chuke ho magar intizar baqi hai

mere kirdār meñ muzmar hai tumhārā kirdār

dekh kar kyuuñ mirī tasvīr ḳhafā ho tum log

mere kirdar mein muzmar hai tumhaara kirdar

dekh kar kyun meri taswir KHafa ho tum log

iqrār-e-mohabbat to baḌī baat hai lekin

inkār-e-mohabbat kī adā aur hī kuchh hai

iqrar-e-mohabbat to baDi baat hai lekin

inkar-e-mohabbat ki ada aur hi kuchh hai

mire dil pe haath rakh kar mujhe dene vaale taskīñ

kahīñ dil kī dhaḌkanoñ se tujhe choT aa na jaa.e

mere dil pe hath rakh kar mujhe dene wale taskin

kahin dil ki dhaDkanon se tujhe choT aa na jae