کام اب کوئی نہ آئے گا بس اک دل کے سوا

راستے بند ہیں سب کوچۂ قاتل کے سوا

انقلاب آئے گا رفتار سے مایوس نہ ہو

بہت آہستہ نہیں ہے جو بہت تیز نہیں

سو ملیں زندگی سے سوغاتیں

ہم کو آوارگی ہی راس آئی

پرانے سال کی ٹھٹھری ہوئی پرچھائیاں سمٹیں

نئے دن کا نیا سورج افق پر اٹھتا آتا ہے

دامن جھٹک کے وادئ غم سے گزر گیا

اٹھ اٹھ کے دیکھتی رہی گرد سفر مجھے

یہ کس نے فون پے دی سال نو کی تہنیت مجھ کو

تمنا رقص کرتی ہے تخیل گنگناتا ہے

شکایتیں بھی بہت ہیں حکایتیں بھی بہت

مزا تو جب ہے کہ یاروں کے رو بہ رو کہیے

بہت برباد ہیں لیکن صدائے انقلاب آئے

وہیں سے وہ پکار اٹھے گا جو ذرہ جہاں ہوگا

اسی لیے تو ہے زنداں کو جستجو میری

کہ مفلسی کو سکھائی ہے سرکشی میں نے

مقتل شوق کے آداب نرالے ہیں بہت

دل بھی قاتل کو دیا کرتے ہیں سر سے پہلے

تو وہ بہار جو اپنے چمن میں آوارہ

میں وہ چمن جو بہاراں کے انتظار میں ہے

یہ مے کدہ ہے یہاں ہیں گناہ جام بدست

وہ مدرسہ ہے وہ مسجد وہاں ملے گا ثواب

اسی دنیا میں دکھا دیں تمہیں جنت کی بہار

شیخ جی تم بھی ذرا کوئے بتاں تک آؤ

شب کے سناٹے میں یہ کس کا لہو گاتا ہے

سرحد درد سے یہ کس کی صدا آتی ہے

پھوٹنے والی ہے مزدور کے ماتھے سے کرن

سرخ پرچم افق صبح پہ لہراتے ہیں

کمی کمی سی تھی کچھ رنگ و بوئے گلشن میں

لب بہار سے نکلی ہوئی دعا تم ہو

پیاس جہاں کی ایک بیاباں تیری سخاوت شبنم ہے

پی کے اٹھا جو بزم سے تیری اور بھی تشنہ کام اٹھا

یہ تیرا گلستاں تیرا چمن کب میری نوا کے قابل ہے

نغمہ مرا اپنے دامن میں آپ اپنا گلستاں لاتا ہے

دل و نظر کو ابھی تک وہ دے رہے ہیں فریب

تصورات کہن کے قدیم بت خانے

پرتو سے جس کے عالم امکاں بہار ہے

وہ نو بہار ناز ابھی رہ گزر میں ہے

تہہ عارض جو فروزاں ہیں ہزاروں شمعیں

لطف اقرار ہے یا شوخئ انکار کا رنگ