میں سمجھتی ہوں جسے یوم ولادت اپنا

در حقیقت وہ مری موت کا پہلا دن تھا

مرے دل میں دسمبر جم گیا ہے

پگھل کر سال بھر بہتا رہے گا

کیا مصیبت ہے زندگی یعنی

مجھ کو جینا پڑے گا مرنے تک

تلاشتی ہوں میں دل کی کتاب میں اکثر

وہ پھول تو نے جو مجھ کو کبھی دیا ہی نہیں

کوڑے دانوں میں لاش کی صورت

میں نے دیکھے ہیں پیار کے تحفے

جیسے دیمک زدہ کوئی لکڑی

یوں ترا ہجر کھائے جاتا ہے

جو الگ ہو گیا تھا جھرمٹ سے

اس پرندے کی خیر ہو مولا

تیری یادوں کی باندھ کر گٹھڑی

میں بہت دور پھینک آئی ہوں

نئی نئی تو میں شہر سخن میں آئی ہوں

ابھی تو مجھ پہ نہ پتھر اچھالیے صاحب

ہجر کچھ اس طرح عطا ہو مجھے

میرا جس میں وصال ہو جائے