maiñ samajhtī huuñ jise yaum-e-vilādat apnā

dar-haqīqat vo mirī maut kā pahlā din thā

main samajhti hun jise yaum-e-wiladat apna

dar-haqiqat wo meri maut ka pahla din tha

mire dil meñ december jam gayā hai

pighal kar saal bhar bahtā rahegā

mere dil mein december jam gaya hai

pighal kar sal bhar bahta rahega

kyā musībat hai zindagī ya.anī

mujh ko jiinā paḌegā marne tak

kya musibat hai zindagi yani

mujh ko jina paDega marne tak

talāshtī huuñ maiñ dil kī kitāb meñ aksar

vo phuul tū ne jo mujh ko kabhī diyā hī nahīñ

talashti hun main dil ki kitab mein aksar

wo phul tu ne jo mujh ko kabhi diya hi nahin

kūḌe-dānoñ meñ laash kī sūrat

maiñ ne dekhe haiñ pyaar ke tohfe

kuDe-danon mein lash ki surat

main ne dekhe hain pyar ke tohfe

jaise dīmak-zada koī lakḌī

yuuñ tirā hijr khaa.e jaatā hai

jaise dimak-zada koi lakDi

yun tera hijr khae jata hai

jo alag ho gayā thā jhurmuT se

us parinde kī ḳhair ho maulā

jo alag ho gaya tha jhurmuT se

us parinde ki KHair ho maula

terī yādoñ kī bāñdh kar gaThḌī

maiñ bahut duur pheñk aa.ī huuñ

teri yaadon ki bandh kar gaThDi

main bahut dur phenk aai hun

na.ī na.ī to maiñ shahr-e-suḳhan meñ aa.ī huuñ

abhī to mujh pe na patthar uchhāliye sāhab

nai nai to main shahr-e-suKHan mein aai hun

abhi to mujh pe na patthar uchhaaliye sahab

hijr kuchh is tarah atā ho mujhe

merā jis meñ visāl ho jaa.e

hijr kuchh is tarah ata ho mujhe

mera jis mein visal ho jae