عمر سے دھوکا کھا گئے پرکھا نہیں ضمیر

بچہ بچہ ہی رہا بڑھتا رہا شریر

اپنی ضد کی آگ میں زخمی کئے گلاب

اک وحشی نے ڈال کر کلیوں پر تیزاب

اے سترنگی روشنی کیسی شکل بنائی

جو رنگ اپنایا نہیں وہ ہی دیا دکھائی

یہ دنیا کی ریت ہے یا دنیا کا دین

جو اوپر چڑھنے لگے کھینچے اسے زمین

ملا پنڈت سب یہاں کرتے رہے فریب

سوچ رہا نیوٹن وہاں گرتا کیوں ہے سیب

مسجد میں پیدا ہوا سیکھی وہی زبان

طوطا مندر پہ چڑھا دینے لگا اذان

دنیا ایک سراب ہے پختہ ہوا یقین

میں جتنا چلتا گیا اتنی چلی زمین

بڑے شہر سے اپنی دوری رکھیے میلوں میل

جتنی دور سمندر سے ہو اتنی میٹھی جھیل

ناری جگ کی نیو ہے رشتوں کا آدھار

جیسی نظریں ڈالیے ویسا لے آکار

مذہب نے جو ٹھونک دی ہلی نہیں وہ کیل

قدرت ہر مخلوق کو روز کرے تبدیل

دن میں مذہب جاگتا لاکھ بھلی ہے رات

ہر تن لاگے ایک سا اک ہی لاگے ذات

پنچھی اڑ کر چل دیا سوکھ گئی جب جھیل

موت ہے اصلی زندگی موت نہیں تکمیل

اپنے اندر میں گیا اک دن کرنے سیر

اتنا آگے بڑھ گیا پیچھے چھوٹے پیر

ان آنکھوں میں قید ہے اس دنیا کا سار

باہر خالی عکس ہے اندر ہے سنسار

کیا مانگیں بھگوان سے کیا دے گا یہ دیر

رکشا خود چلتا نہیں بنا چلائے پیر

راون زندہ ہی رہا صدیوں جلا شریر

ترکش میں تھا ہی نہیں کبھی رام کے تیر

پرکھوں کی تصویر گلے میں واحد بنی دلیل

سارے گھر کا مان سنبھالے ایک اکیلی کیل

پہلے ہوا کسان کا بالو بالو کھیت

پھر آندھی مہنگائی کی بھر گئی منہ میں ریت

ہر کروٹ پر ہلچل ہوئے من بھی آپا کھوئے

کون بسا ہے میرے اندر کھنن کھنن کھن ہوئے

تن بوڑھا ہونے لگا دھندھلے ہو گئے خواب

رنگ سیاہی کا اڑا مٹنے لگی کتاب

اپنے ہی سب ہاتھ چھڑا لیں برا چلے جو کال

عمریں جتنی بڑھتی جائیں اڑتے جائیں بال

روح نہیں یہ روئی ہے انساں ایک لحاف

جب جب یہ میلا ہوا بدلا گیا غلاف

ایک آنکھ میں دو پتلی ہوں تب ہوگا آدھار

اک پتلی انتر من دیکھے اک دیکھے سنسار

روح بدن کے ساتھ تھی جگ نے دے دی تاپ

پانی نیچے رہ گیا اوپر اڑ گئی بھاپ

کوئی سنبھالے دیر تو کوئی بچائے دین

انسؔ بچا لو آپ ہی مرتی ہوئی زمین

تو مجھ میں محدود ہے میں تجھ میں محدود

میرے سائے میں ترا دکھنے لگا وجود

سب تیری سائنس ہے پھر یہ کیسا یوگ

خدا نمائندے ترے اتنے پچھڑے لوگ

جن کاندھوں پر جھول کر چھوتا تھا آکاش

اک دروازے میں ملی اسی پیڑ کی لاش

ملے جو نینن مد بھرے دھڑکا من کا دوار

تن کے اس دربار کا من ہے چوکیدار

کل یہ ہی بن جائے گی اسی گلے کی پھانس

آج ہوا انمول ہے کھینچ زیادہ سانس

تو تو فقط زمین ہے پھر بھی ترا قصور

گر املی کے بیج سے نکلا نہیں کھجور

بدن اندھیری کوٹھری کھوجو دیا سلائی

انسؔ جگاؤ چیتنا روشن کرو خدائی

سدھ بدھ کھو گئی بانوری جس دن کھلا فریب

ندیا میں گاگر ملی پنگھٹ پر پازیب

چھپا گیا گہرائی میں دریا اپنا حال

میں جب بھی اندر گیا باہر دیا اچھال

آنکھوں میں پانی بھرا پانی میں گرداب

خواب ہتھیلی پر لیے کھڑا رہا تالاب

خود کو چھوٹا کر لیا خود میں خود کو بھینچ

بالآخر چرخاب نے لیا سمندر کھینچ

پیڑ زرد ہونے لگے پھول ہوئے رسہین

لہو شجر کا کھینچ کر پینے لگی زمین

مچھلی جوگن ہو گئی چھوڑ دیا ہے تال

ہم نے انجانے کبھی پھینک دیا تھا جال

من کے بھیتر پریم ہے باہر کوچ کٹھور

اتنا میٹھا جل ملے جتنا گہرا بور

پیروں سے کمزور تھی پھر بھی پلٹا کھیل

لپٹ لپٹ کر پیڑ سے اوپر چڑھ گئی بیل

گھس گئی ہڈی ریڑھ کی جھکنے لگا شریر

لوچ کھا گئی چھت مری بکھر گئے شہتیر

شرابور پلکیں ہوئیں کاجل گیا ہے پھیل

اشکوں کے سیلاب میں بکھر گئی کھپریل

یہ کہہ کر تلوار نے چھوڑی آج میان

قید حصار جسم میں اب نہ رہے گی جان

فطرت سے کی اس قدر انسانوں نے چھیڑ

نکلا جنگل جنگ پر لے مٹھی بھر پیڑ

کوزہ گر کی انگلیاں روح مری مڑھ جائیں

ہولے سے تن کو چھوئیں اندر تک گڑھ جائیں

دور قیامت روک دے کر مجھ کو برباد

میرے خاطر آئے کیوں دنیا پر افتاد

امبر تک لپٹیں اٹھیں جلا گگن کا چھور

میری برہن تھی جہاں دھواں اٹھا اس اور

ماضی کب کا سو گیا سر پر چادر تان

انسؔ کہاں سے جسم پر آنے لگے نشان

ہم نے کی ہے گائے کی مذہب سے پہچان

لیکن دیکھا گائے نے سب کو ایک سمان

پا کر نینن میں اسے تھرک اٹھا تھا نیر

آنچ لگی جب دیر تک افن گئی تصویر