ḳhaak chhānī na kisī dasht meñ vahshat kī hai

maiñ ne ik shaḳhs se ujrat pe mohabbat kī hai

KHak chhani na kisi dasht mein wahshat ki hai

main ne ek shaKHs se ujrat pe mohabbat ki hai

kisī tarah se nazar mutma.in nahīñ hotī

har ek shai ko dobāra badal ke dekhtā huuñ

kisi tarah se nazar mutmain nahin hoti

har ek shai ko dobara badal ke dekhta hun

maiñ aaj ḳhud se mulāqāt karne vaalā huuñ

jahāñ meñ koī bhī mere sivā na rah jaa.e

main aaj KHud se mulaqat karne wala hun

jahan mein koi bhi mere siwa na rah jae

tere andar kī udāsī ke mushābah huuñ maiñ

ḳhāl-o-ḳhad se nahīñ āvāz se pahchān mujhe

tere andar ki udasi ke mushabah hun main

KHal-o-KHad se nahin aawaz se pahchan mujhe

vo ik din jaane kis ko yaad kar ke

mire siine se lag ke ro paḌā thā

wo ek din jaane kis ko yaad kar ke

mere sine se lag ke ro paDa tha