حجاب ان سے وہ میرا پوچھنا سر رکھ کے قدموں پر

سبب کیا ہے جو یوں مجھ سے خفا سرکار بیٹھے ہیں

ملنے کے بعد بیٹھ رہا پھیر کر نگاہ

ظالم یگانہ ہوتے ہی بیگانہ ہو گیا

سینہ سے سینہ ملا دینا تو کچھ مشکل نہیں

یار مشکل تو ترے دل سے ملانا دل کا ہے

کہاں ممکن ہے پوشیدہ غم دل کا اثر ہونا

لبوں کا خشک ہو جانا بھی ہے آنکھوں کا تر ہونا

قیامت تھا ستم تھا قہر تھا خلوت میں او ظالم

وہ شرما کر ترا میری بغل میں جلوہ گر ہونا

محیط رحمت ہے جوش افزا ہوئی ہے ابر سخا کی آمد

خدا کی ہر چیز کہہ رہی ہے کہ اب ہے نور خدا کی آمد

سفارش ہمدموں کی ان کا جاتے وقت یہ کہنا

کہ جب تڑپے مری تصویر سینہ سے لگا دینا