kuud kar dīvār 'arshī' ġham gharoñ meñ aa base

anginat tā'vīz darvāzoñ pe laTke rah ga.e

kud kar diwar 'arshi' gham gharon mein aa base

anginat ta'wiz darwazon pe laTke rah gae

ik lafz bhī na lab se kahā aur ro diye

'arshī' uThā.e dast-e-du'ā aur ro diye

ek lafz bhi na lab se kaha aur ro diye

'arshi' uThae dast-e-du'a aur ro diye

lab-e-ḳhāmosh meñ hī jā-e-amāñ aaj bhī hai

varna kahne ko to har muñh meñ zabāñ aaj bhī hai

lab-e-KHamosh mein hi ja-e-aman aaj bhi hai

warna kahne ko to har munh mein zaban aaj bhi hai

tū chhuḌā kar haath ik din daf'atan kho jā.egā

aur merī jeb meñ terā pata rah jā.egā

tu chhuDa kar hath ek din daf'atan kho jaega

aur meri jeb mein tera pata rah jaega

tire aḳhlāq-o-ḳhasā.il tirī pahchān baneñ

naam logoñ ko qabīle kā batānā na paḌe

tere aKHlaq-o-KHasail teri pahchan banen

nam logon ko qabile ka batana na paDe

sab ke sab mil kar bhī mujh ko zer kar sakte na the

merā apnā haath shāmil hai mirī paspā.ī meñ

sab ke sab mil kar bhi mujh ko zer kar sakte na the

mera apna hath shamil hai meri paspai mein

kisī ke lahje kī yaḳh-bastagī qayāmat thī

ThiThur ke rah gayā lab par savāl kā mausam

kisi ke lahje ki yaKH-bastagi qayamat thi

ThiThur ke rah gaya lab par sawal ka mausam

ik 'umr se ulfat ke kaTahre meñ khaḌā hai

bhugtā.e haiñ is dil ne muqadmāt musalsal

ek 'umr se ulfat ke kaTahre mein khaDa hai

bhugtae hain is dil ne muqadmat musalsal