husain aaj bhī qaa.em hai apnī sūrat par

yazīd chehre badaltā hai har zamāne meñ

husain aaj bhi qaem hai apni surat par

yazid chehre badalta hai har zamane mein

dost-dārī ke salīqe se bahut vāqif huuñ

ab mujhe haath milāne kā hunar aatā hai

dost-dari ke saliqe se bahut waqif hun

ab mujhe hath milane ka hunar aata hai

tujhe chhū kar mujhe kaisā lagegā

havā ke haath ban kar sochtā huuñ

tujhe chhu kar mujhe kaisa lagega

hawa ke hath ban kar sochta hun

tum un ke haat pe sikke nahīñ diye rakkho

ye andhe log haiñ aur raushnī ke bhūke haiñ

tum un ke hat pe sikke nahin diye rakkho

ye andhe log hain aur raushni ke bhuke hain

ik yaqīñ-parvar gumāñ aur ik hayāt-āmez ḳhvāb

jaise koī aa.egā aur uljhaneñ le jā.egā

ek yaqin-parwar guman aur ek hayat-amez KHwab

jaise koi aaega aur uljhanen le jaega

hamārā jism to phir jism Thahrā

darāḌeñ aib haiñ dīvār meñ bhī

hamara jism to phir jism Thahra

daraDen aib hain diwar mein bhi

jal rahā hai jo lab-e-bām abhī ek charāġh

bujh gayā ye bhī to phir raat mukammal hogī

jal raha hai jo lab-e-baam abhi ek charagh

bujh gaya ye bhi to phir raat mukammal hogi

mire ḳhamīr se ye kā.enāt uThāte hue

use ġhurūr bahut thā mujhe banāte hue

mere KHamir se ye kaenat uThate hue

use ghurur bahut tha mujhe banate hue

aag paanī bhī kabhī ek hue dekhe haiñ

ātish-e-zabt lahū meñ bhī nahīñ hal hogī

aag pani bhi kabhi ek hue dekhe hain

aatish-e-zabt lahu mein bhi nahin hal hogi

ujāloñ ke kisī autār hī se jā ke pūchho

jise sūraj kahā jaatā hai vo sūraj kahāñ hai

ujalon ke kisi autar hi se ja ke puchho

jise suraj kaha jata hai wo suraj kahan hai

zamīñ ke mālik-o-muḳhtār kī sunnat samajh kar

khaḌāveñ pahn liiñ aur bakriyāñ rakkhī huī haiñ

zamin ke malik-o-muKHtar ki sunnat samajh kar

khaDawen pahn lin aur bakriyan rakkhi hui hain

tapte sahrā ḳhuun piyeñge chaḌhtā sūraj Dhal jā.egā

baiThī huī hai jis meñ sakīna aaj vo ḳhema jal jā.egā

tapte sahra KHun piyenge chaDhta suraj Dhal jaega

baiThi hui hai jis mein sakina aaj wo KHema jal jaega

koshish kā ik tavīl safar thā aur us ke baa'd

paanī kī ek buuñd se patthar bhī phaT ga.e

koshish ka ek tawil safar tha aur us ke ba'd

pani ki ek bund se patthar bhi phaT gae

ujaaḌ raat meñ rah kar havā ke hote hue

koī to hai jo charāġhoñ kī baat kartā hai

ujaD raat mein rah kar hawa ke hote hue

koi to hai jo charaghon ki baat karta hai

hamārī kārobārī zindagī kā kul asāsa

ye kuchh sikke haiñ aur kuchh parchiyāñ rakkhī huī haiñ

hamari karobari zindagi ka kul asasa

ye kuchh sikke hain aur kuchh parchiyan rakkhi hui hain

vo kyā ki jis ko mayassar hai mustaqil honā

sarisht-e-zaḳhm meñ shāmil hai mundamil honā

wo kya ki jis ko mayassar hai mustaqil hona

sarisht-e-zaKHm mein shamil hai mundamil hona

vahī jin chādaroñ ko dasht meñ khīñchā gayā thā

tabarruk meñ ye un kī dhajjiyāñ rakkhī huī haiñ

wahi jin chadaron ko dasht mein khincha gaya tha

tabarruk mein ye un ki dhajjiyan rakkhi hui hain

maiñ ne us had se guzarne kī bahut koshish kī

jis jagah rang se tasvīr alag hotī hai

main ne us had se guzarne ki bahut koshish ki

jis jagah rang se taswir alag hoti hai

jhaaḌ kar ham ret apne paañv se

boTiyāñ chunte rahe sahrāoñ se

jhaD kar hum ret apne panw se

boTiyan chunte rahe sahraon se