aatā nahīñ jo sāmne maare hijāb ke

ham dil se haiñ nisār usī āftāb ke

aata nahin jo samne mare hijab ke

hum dil se hain nisar usi aaftab ke

bharosa hai tirā hī aur hai tere sivā kis kā

na deve aasrā jab tū mujhe ho aasrā kis kā

bharosa hai tera hi aur hai tere siwa kis ka

na dewe aasra jab tu mujhe ho aasra kis ka

nekī kā koī kaam hī aayā nahīñ mujh se

kyā hovegā anjām mirā kuchh nahīñ ma.alūm

neki ka koi kaam hi aaya nahin mujh se

kya howega anjam mera kuchh nahin malum

hairāñ thā ki dil merā kahāñ jā ke chhupā hai

jugnū kī tarah yaar kī dastār meñ chamkā

hairan tha ki dil mera kahan ja ke chhupa hai

jugnu ki tarah yar ki dastar mein chamka

nuur thā yā sho.ala thā yā barq yā ḳhurshīd thā

kuchh to ai muusā kaho kyā thā vo jalva tuur kā

nur tha ya shoala tha ya barq ya KHurshid tha

kuchh to ai musa kaho kya tha wo jalwa tur ka

jab ġhunche ne sar apnā garebāñ se nikālā

bulbul ne qadam phir na gulistāñ se nikālā

jab ghunche ne sar apna gareban se nikala

bulbul ne qadam phir na gulistan se nikala

jalva-gar thā har jagah kā'ba thā yā but-ḳhāna thā

ghar hazāroñ the magar vo ek sāhab-ḳhāna thā

jalwa-gar tha har jagah ka'ba tha ya but-KHana tha

ghar hazaron the magar wo ek sahab-KHana tha