aurat ko chāhiye ki adālat kā ruḳh kare

jab aadmī ko sirf ḳhudā kā ḳhayāl ho

aurat ko chahiye ki adalat ka ruKH kare

jab aadmi ko sirf KHuda ka KHayal ho

vahāñ jo log anāḌī haiñ vaqt kāTte haiñ

yahāñ bhī kuchh mutashā.er dimāġh chāTte haiñ

wahan jo log anaDi hain waqt kaTte hain

yahan bhi kuchh mutashaer dimagh chaTte hain

aa ke bazm-e-sher meñ shart-e-vafā puurī to kar

jitnā khānā khā gayā hai utnī mazdūrī to kar

aa ke bazm-e-sher mein shart-e-wafa puri to kar

jitna khana kha gaya hai utni mazduri to kar

juute ke intiḳhāb ko masjid meñ jab ga.e

vo jūtiyāñ paḌīñ ki ḳhudā yaad aa gayā

jute ke intiKHab ko masjid mein jab gae

wo jutiyan paDin ki KHuda yaad aa gaya

pūchhī jo us kī vaj.h to kahne lage janāb

sardī bahut shadīd thī misra sikuḌ gayā

puchhi jo us ki wajh to kahne lage janab

sardi bahut shadid thi misra sikuD gaya

murdamāñ bisyār hoñge aur jā-e-qabr tañg

qabr kī taqsīm par murdoñ meñ chhiḌ jā.egī jañg

murdaman bisyar honge aur ja-e-qabr tang

qabr ki taqsim par murdon mein chhiD jaegi jang

ek rivāyat ye bhī hai vo byaah ke qābil na thā

varna lailā ko bhagā lenā koī mushkil na thā

ek riwayat ye bhi hai wo byah ke qabil na tha

warna laila ko bhaga lena koi mushkil na tha

pakḌī ga.ī radīf to fauran ye kah diyā

likhnā kabhī thā aur maiñ yahāñ likh gayā abhī

pakDi gai radif to fauran ye kah diya

likhna kabhi tha aur main yahan likh gaya abhi

hamārā dost tufailī bhī hai baḌā shā.er

agarche ek baḌe aadmī kā chamcha hai

hamara dost tufaili bhi hai baDa shaer

agarche ek baDe aadmi ka chamcha hai

pāyān-e-kār ḳhatm huā jab ye tajziya

maiñ ne kahā huzūr to bole ki shukriya

payan-e-kar KHatm hua jab ye tajziya

main ne kaha huzur to bole ki shukriya

siyāh zulf ko jo ban-sañvar ke dekhte haiñ

safed baal kahāñ apne sar ke dekhte haiñ

siyah zulf ko jo ban-sanwar ke dekhte hain

safed baal kahan apne sar ke dekhte hain

kahīñ golī likhā hai aur kahīñ maar

ye golīmār likkhā jā rahā hai

kahin goli likha hai aur kahin mar

ye golimar likkha ja raha hai

ġhazal churā ke kabhī ḳhidmat-e-adab kar lī

pakaḌ ga.e to vahīñ ma.azarat talab kar lī

ghazal chura ke kabhi KHidmat-e-adab kar li

pakaD gae to wahin mazarat talab kar li

sunā ye hai ki vo suufī bhī thā valī bhī thā

ab is ke baa'd to paiġhambarī kā darja hai

suna ye hai ki wo sufi bhi tha wali bhi tha

ab is ke ba'd to paighambari ka darja hai

ek shādī to Thiik hai lekin

ek do tiin chaar had kar dī

ek shadi to Thik hai lekin

ek do tin chaar had kar di

ik rivāyat ye bhī hai lailā kī maañ thī bad-chalan

vo to banñā chāhtī thī ḳhud hī majnūñ kī dulhan

ek riwayat ye bhi hai laila ki man thi bad-chalan

wo to banna chahti thi KHud hi majnun ki dulhan

iġhvā hī karnā thā to koī kam the lakh-pati

kis ne kahā thā road se kañglā uThā.iye

ighwa hi karna tha to koi kam the lakh-pati

kis ne kaha tha road se kangla uThaiye

ḳhush-qismatī se ham haiñ savār us jahāz par

sāhil pe jis jahāz kā kaptān rah gayā

KHush-qismati se hum hain sawar us jahaz par

sahil pe jis jahaz ka kaptan rah gaya

is kā kyā hogā ye jo unvān aadhā rah gayā

ye bhī lete jaa.eñ jo sāmān aadhā rah gayā

is ka kya hoga ye jo unwan aadha rah gaya

ye bhi lete jaen jo saman aadha rah gaya

sochā thā aadmī kā qasīda likheñge ham

matlā kahā hī thā ki gadhā yaad aa gayā

socha tha aadmi ka qasida likhenge hum

matla kaha hi tha ki gadha yaad aa gaya

maiñ bhī thā hāzir bazm meñ jab tū ne dekhā hī nahīñ

maiñ bhī uThā kar chal diyā bilkul nayā juutā tirā

main bhi tha hazir bazm mein jab tu ne dekha hi nahin

main bhi uTha kar chal diya bilkul naya juta tera

ek achchhā-ḳhāsā mard zanāne meñ ghus paḌā

goyā ki ek chor ḳhazāne meñ ghus paḌā

ek achchha-KHasa mard zanane mein ghus paDa

goya ki ek chor KHazane mein ghus paDa

kal chaudhvīñ kī raat thī ābād thā kamrā tirā

hotī rahī dhin-tāk-dhin bajtā rahā tabla tirā

kal chaudhwin ki raat thi aabaad tha kamra tera

hoti rahi dhin-tak-dhin bajta raha tabla tera

yuuñ bhī ik daftar ne mujh pe ḳhauf taarī kar diyā

bil raqīboñ kā thā mere naam jaarī kar diyā

yun bhi ek daftar ne mujh pe KHauf tari kar diya

bil raqibon ka tha mere nam jari kar diya

ġhazal kī shakl badal dī hai operation se

suḳhan-varī hai agar ye to surgery kyā hai

ghazal ki shakl badal di hai operation se

suKHan-wari hai agar ye to surgery kya hai

bas meñ baiThī hai mire paas jo ik zohra-jabīñ

mard niklegī agar zulf muñDā dī jaa.e

bas mein baiThi hai mere pas jo ek zohra-jabin

mard niklegi agar zulf munDa di jae

is ko kahte haiñ ḳhudā kī den ye hotī hai den

ab civil-surgeon banegā jānashīn-e-tān-sen

is ko kahte hain KHuda ki den ye hoti hai den

ab ciwil-surgeon banega jaanashin-e-tan-sen

maut bhī us shaḳhs tak aate hue ghabrā.egī

jis ke sar par naza.a meñ Daflī bajā.ī jā.egī

maut bhi us shaKHs tak aate hue ghabraegi

jis ke sar par naza mein Dafli bajai jaegi

ye list choroñ kī vaqtī o ittifāqī hai

varaq tamām huā aur mad.h baaqī hai

ye list choron ki waqti o ittifaqi hai

waraq tamam hua aur madh baqi hai

ek shauhar ek begam ek bhāvaj ek nand

be-takalluf ek hī kholī meñ ho jaate haiñ band

ek shauhar ek begam ek bhawaj ek nand

be-takalluf ek hi kholi mein ho jate hain band

iḳhtilāj-e-qalb kī vāhid davā hai aaj kal

'bekal-utsāhī' se suniye ai mirī jān-e-ġhazal

iKHtilaj-e-qalb ki wahid dawa hai aaj kal

'bekal-utsahi' se suniye ai meri jaan-e-ghazal

sirf zindoñ hī ko fikr-e-aish-o-āsā.ish nahīñ

ab to is duniyā meñ murdoñ kī bhī gunjā.ish nahīñ

sirf zindon hi ko fikr-e-aish-o-asaish nahin

ab to is duniya mein murdon ki bhi gunjaish nahin

ghar kī tahzīb aur hai daftar kā culture aur hai

ghar ke andar aur haiñ ham ghar ke bāhar aur ham

ghar ki tahzib aur hai daftar ka culture aur hai

ghar ke andar aur hain hum ghar ke bahar aur hum

maiñ ne kahā kalām-e-'ravish' lā-javāb hai

kahne lage ki un kā tarannum ḳharāb hai

main ne kaha kalam-e-'rawish' la-jawab hai

kahne lage ki un ka tarannum KHarab hai

is liye ham ne banāyā hai ye manifesto

''man tirā ahmaq bagoyam tū murā ahmaq bago''

is liye hum ne banaya hai ye manifesto

man tera ahmaq bagoyam tu mura ahmaq bago

Thele par dīvān laayā hai ye shaḳhs is se milo

is kī ġhazloñ kā nayā majmūa do ruupe kilo

Thele par diwan laya hai ye shaKHs is se milo

is ki ghazlon ka naya majmua do rupe kilo

ye idāre bhī na hoñge jab to hai is kā bhī Dar

chaltī-phirtī shā.erī hogī yahāñ har road par

ye idare bhi na honge jab to hai is ka bhi Dar

chalti-phirti shaeri hogi yahan har road par

vasl kī raat jo mahbūb kahe good night

qā.eda ye hai ki english meñ duā dī jaa.e

wasl ki raat jo mahbub kahe good night

qaeda ye hai ki english mein dua di jae

har baat par jo kahtā rahā maiñ bajā bajā

us ne kahā ki yuuñ hī musalsal bajā karo

har baat par jo kahta raha main baja baja

us ne kaha ki yun hi musalsal baja karo

qabz ke maare hue bīmār ko kar do ḳhabar

ek Thumrī meñ hai itrifal zamānī kā asar

qabz ke mare hue bimar ko kar do KHabar

ek Thumri mein hai itrifal zamani ka asar

aap ko marnā hai to pahle se notice dījiye

yā'nī jurm-e-intiqāl-e-nā-gahāñ mat kījiye

aap ko marna hai to pahle se notice dijiye

ya'ni jurm-e-intiqal-e-na-gahan mat kijiye

tumhāre ghar meñ maiñ kuudā zarūr huuñ lekin

visāl-osāl kī niyyat se maiñ nahīñ aayā

tumhaare ghar mein main kuda zarur hun lekin

visal-osal ki niyyat se main nahin aaya

kitne ġhālib the jo paidā hue aur mar bhī ga.e

qadr-dānoñ ko taḳhallus kī ḳhabar hone tak

kitne ghaalib the jo paida hue aur mar bhi gae

qadr-danon ko taKHallus ki KHabar hone tak

junūñ ye aur baḌhegā to rang lā.egā

ye aadmī kabhī kutte ko kaaT khā.egā

junun ye aur baDhega to rang laega

ye aadmi kabhi kutte ko kaT khaega

na koī dost na hamdam na āshnā na habīb

usī se ḳhauf ziyāda jo hai ziyāda qarīb

na koi dost na hamdam na aashna na habib

usi se KHauf ziyaada jo hai ziyaada qarib

shā.er the band ek cinema ke haal meñ

panchhī phañse hue the shikārī ke jaal meñ

shaer the band ek cinema ke haal mein

panchhi phanse hue the shikari ke jal mein

kyā batā.ūñ meñ tumheñ is shahr kā juġhrāfiya

bamba.ī hai ik ġhazal gaḌ-baḌ hai jis kā qāfiya

kya bataun mein tumhein is shahr ka jughrafiya

bambai hai ek ghazal gaD-baD hai jis ka qafiya

ḳhudī buland ho be-shak yahī thī merī raa.e

ye kab kahā thā ki qavvāl is meñ haath lagā.e

KHudi buland ho be-shak yahi thi meri rae

ye kab kaha tha ki qawwal is mein hath lagae

afsos ki ik shaḳhs ko dil dene se pahle

maTke kī tarah Thoñk bajā kar nahīñ dekhā

afsos ki ek shaKHs ko dil dene se pahle

maTke ki tarah Thonk baja kar nahin dekha

jaañ dene ko pahuñche the sabhī terī galī meñ

bhāge to kisī ne bhī palaT kar nahīñ dekhā

jaan dene ko pahunche the sabhi teri gali mein

bhage to kisi ne bhi palaT kar nahin dekha