دیکھ سقراط نے بس زہر پیا تھا لیکن

زندگی میں تو تجھے گھول کے پی جاؤں گی

تمہاری یاد ہے ماتم کناں ابھی مجھ میں

تمہارا درد ابھی تک سیہ لباس میں ہے

کچھ اس لیے بھی مجھے کامیابی ملتی ہے

میں اپنے بابا کے نقش قدم پہ چلتی ہوں

وقت جب آئنہ دکھاتا ہے

آدمی خود کو بھول جاتا ہے

آج پھر تم کو ہم نے دیکھا ہے

آج محشر بنی ہیں یہ آنکھیں

ہم نے غزلوں میں جو اتارا ہے

تری آنکھوں کا استعارہ ہے

میرے خوابوں میں روز آتی ہیں

اپنی آنکھیں سنبھال کر رکھیے

میری بینائی کم نہیں ہوگی

میری آنکھوں میں ماں کا چہرہ ہے

مجھ کو ہر لمحہ مری ماں سے محبت ہے ربابؔ

میں کسی روز بھلا دوں اسے ممکن ہی نہیں

عشق جب سے مجھے میسر ہے

خود کو ہوتی نہیں میسر میں

تیرگی جو بڑھتی ہے اک دیا جلاتی ہوں

یوں بھی اپنی ہستی کو آئنہ بناتی ہوں

جب وہ کہتی ہے یوں کہ اف توبہ

میری توبہ ہی ٹوٹ جاتی ہے

کوزہ گر میں تری محبت میں

اپنی صورت بگاڑ لیتی ہوں

کہا اس نے بتاؤ میرے بن یہ زندگی کیا ہے

کہا میں نے وہی جو پانیوں میں جھاگ ہوتے ہیں

مجھ سے پوچھا جو کسی نے تری پہچان بتا

میں پکاری میں تمہاری میں تمہاری مولا

عکس جو آسماں پہ رکھا ہے

ایک دن آئنہ میں اترے گا

سر پہ گر سائباں نہیں تو کیا

بھیا میرا تو کل جہاں ہو تم