محبت کرنے والے کم نہ ہوں گے

تری محفل میں لیکن ہم نہ ہوں گے

دوستی عام ہے لیکن اے دوست

دوست ملتا ہے بڑی مشکل سے

زمانے بھر کے غم یا اک ترا غم

یہ غم ہوگا تو کتنے غم نہ ہوں گے

اگر تو اتفاقاً مل بھی جائے

تری فرقت کے صدمے کم نہ ہوں گے

دنیا میں ہیں کام بہت

مجھ کو اتنا یاد نہ آ

دل سے آتی ہے بات لب پہ حفیظؔ

بات دل میں کہاں سے آتی ہے

تمام عمر ترا انتظار ہم نے کیا

اس انتظار میں کس کس سے پیار ہم نے کیا

تری تلاش ہے یا تجھ سے اجتناب ہے یہ

کہ روز ایک نئے راستے پہ چلتے ہیں

تمام عمر کیا ہم نے انتظار بہار

بہار آئی تو شرمندہ ہیں بہار سے ہم

ترے جاتے ہی یہ عالم ہے جیسے

تجھے دیکھے زمانہ ہو گیا ہے

نظر سے حد نظر تک تمام تاریکی

یہ اہتمام ہے اک وعدۂ‌ سحر کے لیے

دل میں اک شور سا اٹھا تھا کبھی

پھر یہ ہنگامہ عمر بھر ہی رہا

تری تلاش میں جب ہم کبھی نکلتے ہیں

اک اجنبی کی طرح راستے بدلتے ہیں

ہم کو منزل نے بھی گمراہ کیا

راستے نکلے کئی منزل سے

کہیں یہ ترک محبت کی ابتدا تو نہیں

وہ مجھ کو یاد کبھی اس قدر نہیں آئے

جب کبھی ہم نے کیا عشق پشیمان ہوئے

زندگی ہے تو ابھی اور پشیماں ہوں گے

یہ تمیز عشق و ہوس نہیں ہے حقیقتوں سے گریز ہے

جنہیں عشق سے سروکار ہے وہ ضرور اہل ہوس بھی ہیں

یہ دل کشی کہاں مری شام و سحر میں تھی

دنیا تری نظر کی بدولت نظر میں ہے

اب یہی میرے مشاغل رہ گئے

سوچنا اور جانب در دیکھنا

غم زمانہ تری ظلمتیں ہی کیا کم تھیں

کہ بڑھ چلے ہیں اب ان گیسوؤں کے بھی سائے

غم زندگانی کے سب سلسلے

بالآخر غم عشق سے جا ملے

آہ مرگ آدمی پر آدمی روئے بہت

کوئی بھی رویا نہ مرگ آدمیت کے لیے

یہ بات کہہ کے ہوا ناخدا الگ مجھ سے

یہ ہے سفینہ یہ گرداب ہے وہ ہے ساحل

جلوہ بے باک ادا شوخ تماشا گستاخ

اٹھ گئے بزم سے آداب نظر میرے بعد