aasmaa.n mil na sakaa dhartii pe aayaa na gayaa zindagii ham se ko.ii Thaur banaayaa na gayaa aas.maa.n mujh se miyaa.n hujre me.n laayaa na gayaa shaa.irii chho.D dii mafhuum churaayaa na gayaa naukrii kii, likhii nazme.n, sukuu.n paayaa na gayaa shahr-e-dil tujh ko kisii taur basaayaa na gayaa ghar kii viiraaniyaa.n rusvaa hu.ii.n bekaar me.n hii mujh se baazaar me.n bhii vaqt bitaayaa na gayaa josh me.n Dhaa to dii rishte kii imaarat lekin dono.n se aaj talak malba haTaayaa na gayaa KHuun ke daaG na aa jaa.e.n mire lahje me.n is liye Gazlo.n ko aKHbaar banaayaa na gayaa dikh na jaa.e tuu bichha.Dtii hu.ii bas is Dar se mujh se aa.nkho.n ko ko.ii KHvaab dikhaayaa na gayaa apnaa hissa bhii to maa.ngaa hai zamii.n se mai.n ne aas.maa.n yuu.n hii mire sar pe giraayaa na gayaa jo tirii yaad ke panchhii na ruke kyaa hai ajab umr bhar dil me.n to tujh ko bhii biThaayaa na gayaa zaat maz.hab ki zabaa.n naam usii ke to hai.n sab KHud ko jis qaid se taa-umr chhu.Daayaa na gayaa KHaak dariyaa ke kinaaro.n ko milaa.uu.ngaa mai.n KHud ko hii aaj talak KHud se milaayaa na gayaa meraa iimaan hu.aa KHarch jise paane me.n kyaa Gazab hogaa jo us shai ko bachaayaa na gayaa