شاید وہ اس بنا پہ ہمیں بخش دے کہ ہم

کافر بنے رہے پہ منافق نہیں ہوئے

تیری طرح زبان کے کچھ تیز ہم بھی ہیں

پر مسئلہ یہ ہے کہ ادب جانتے ہیں ہم

چلو مانا کہ خوابوں میں ملو گے

مگر تم بن کسے نیند آ رہی ہے

پہلے ہونا تھا آئنہ دل کو

اور پھر چور چور ہونا تھا

لوگ میری غزلوں میں تم کو ڈھونڈ لیتے ہیں

شعر و شاعری کب ہے داستاں تمہاری ہے

مشہور ہو چکی ہے کسی کے لبوں کی بات

اخبار دلبراں کی سبھی سرخیاں پڑھو

اس کے سیاہ نین کی جا کر نظر اتار

مارے حسد کے چور ہوئیں سرمہ دانیاں

یہ انتہائے کار نمو ہے کہ جان جاں

اس نے ترے بدن سی کوئی چیز خلق کی

سیارگاں میں عجب اضطراب برپا ہے

وہ بن سنور کے سر بام آ رہے ہوں گے