jahāñ tum ho vahāñ se duur paḌtī hai zamīñ merī

jahāñ maiñ huuñ vahāñ se āsmāñ nazdīk paḌtā hai

jahan tum ho wahan se dur paDti hai zamin meri

jahan main hun wahan se aasman nazdik paDta hai

mire sehan par khulā āsmān rahe ki maiñ

use dhuup chhāñv meñ bāñTanā nahīñ chāhtā

mere sehan par khula aasman rahe ki main

use dhup chhanw mein banTana nahin chahta

mujhe is ḳhvāb ne ik arse tak be-tāb rakkhā hai

ik ūñchī chhat hai aur chhat par koī mahtāb rakkhā hai

mujhe is KHwab ne ek arse tak be-tab rakkha hai

ek unchi chhat hai aur chhat par koi mahtab rakkha hai

sunā rahī hai jise joḌ joḌ kar duniyā

tamām TukḌe haiñ vo merī dāstān ke hī

suna rahi hai jise joD joD kar duniya

tamam TukDe hain wo meri dastan ke hi

ye dil had se guzarnā chāhtā thā

magar majbūr ho kar rah gayā hai

ye dil had se guzarna chahta tha

magar majbur ho kar rah gaya hai