گردش ایام سے چلتی ہے نبض کائنات

وقت کا پہیہ رکا تو زندگی رک جائے گی

خود اپنے آپ سے رہتا ہے آدمی ناراض

اداسیوں کے بھی اپنے مزاج ہوتے ہیں

مجھ سے تو کوئی تاج محل بھی نہ بن سکا

بے نام دل کی قبر میں دفنا دیا تجھے

تازہ ہوا خریدنے آتے ہیں گاؤں میں

شاہدؔ شہر کے لوگ بھی کیسے عجیب ہیں

باندھ کے عہد وفا لوگ چلے جاتے ہیں

چھوڑ جاتے ہیں فقط جسم کی الجھی گانٹھیں

وہ مجھ سے پیار کب کرتا ہے بس ملتا ملاتا ہے

کرائے کے مکاں میں کب کوئی پودا لگاتا ہے

مجھے خاموشیاں پڑھنے کا فن آتا تو پڑھ لیتا

تمہاری جھیل سی خاموش آنکھوں کی پشیمانی

ریل کی پٹری فسردہ شام تیرا سوٹ کیس

پھر سے آنکھوں میں ترے جانے کا منظر آ گیا

یہ اور بات کہ تو دو قدم پہ بھول گیا

ہمیں تو حشر تلک تیرا انتظار رہا

دوسروں کی بات آئی تو پیمبر تھا وہ شخص

اپنی باری پر محبت سے ہی مرتد ہو گیا

پڑھتا ہے بڑے شوق سے وہ میری کتابیں

جس بات سے ڈرتا ہوں وہی بات نہ پڑھ لے

غم کو احساس کی مٹی میں خدا نے گوندھا

اور کچھ اشک ملائے تو پھر انسان کیا

مری آنکھوں میں کیلیں ٹھونک دو ہونٹوں کو سلوا دو

بصیرت جرم ہے میرا صداقت میری عادت ہے

اب کے امید وفا باندھ رہا ہوں جس سے

لوگ کہتے ہیں کہ وہ شخص بھی ہرجائی ہے

مجھ سے لپٹا ہے امربیل کے مانند کوئی

مجھ کو بے برگ نہ کرتا تو ثمر دیتا کیا

محبت روپ میں ڈھلتی تو وہ اک دیوتا ہوتا

میں اس کو پوجنے لگتا اگر وہ با وفا ہوتا

جانے ہیں کس حسین تعلق کی یادگار

مجھ کو بہت عزیز ہیں میری یہ وحشتیں

مرے وجداں کی گرہیں کھولتا ہے

مرا ہم زاد مجھ میں بولتا ہے

چھڑکا گیا ہے زہر فضاؤں میں اس طرح

ماؤں نے اپنی کوکھ سے بوڑھے جنم دئے

اشتیاق رقص میں حد سے نکلتے جا رہے

دائرے کو کھینچ کر اوقات میں لانا پڑا

وہ شخص بول رہا تھا خدا کے لہجے میں

میں سن رہا تھا مگر میں کلیم وقت نہ تھا

تکلم ہم سے کرتا ہے تو یوں جیسے شہنشہ کو

محبت کا کوئی نسخہ قلندر پیش کرتا ہے