اور تو کچھ بھی نہیں حضرت ماچسؔ لیکن

آپ میں آگ لگانے کا کمال اچھا ہے

وہ ان کا زمانہ تھا جہاں عقل بڑی تھی

یہ میرا زمانہ ہے یہاں بھینس بڑی ہے

واعظ نے مجھ میں دیکھی ہے ایمان کی کمی

واعظ میں صرف دم کی کسر دیکھتا ہوں میں

جس مولوی کو آگے پڑھانا تھا میرا عقد

ٹھہرا ہے ان کا عقد اسی مولوی کے ساتھ

ڈھونڈئیے خیر سے جا کر کوئی موٹی سسرال

ہاتھ جو مفت میں آئے تو وہ مال اچھا ہے

واعظ کو جو دیکھو تو گھٹا ٹوپ اندھیرا

ساقی کو جو دیکھو تو کرن پھوٹ رہی ہے

حکم بیگم کے چلا کرتے ہیں جیلر کی طرح

اب مرا گھر بھی مجھے جیل ہوا جاتا ہے

تعداد میں ہیں عورتیں مردوں سے زیادہ

قوالیاں موجود ہیں قوال ندارد

جیسے اسلام میں ہے رسم مسلمانی کی

ویسے ہی عشق میں ہے چاک گریبانی کی

جو بھی ہارے گا وہی گالیاں دے گا اس کو

جس برہمن نے کہا ہے کہ یہ سال اچھا ہے

اس قدر صرف الٰہی مرے خون دل کا

اب محبت کا بجٹ فیل ہوا جاتا ہے

نظم جہاں کو زیر و زبر دیکھتا ہوں میں

مادہ کے اختیار میں نر دیکھتا ہوں میں

اللہ رے رعب و داب جنوں بھاگتا ہے وہ

جس کی طرف اٹھا کے نظر دیکھتا ہوں میں

سائے کی تمنا میں جہاں بیٹھ گیا ہوں

چندیا پہ وہیں تاک کے دیوار گری ہے

مرے پر اس کو سو درے نہ کہئے پھر تو کیا کہئے

ترے عاشق کی میت ڈاکٹر خانے میں رکھی ہے