آنکھوں سے محبت کے اشارے نکل آئے

برسات کے موسم میں ستارے نکل آئے

مجھ سے دلی کی نہیں دل کی کہانی سنئے

شہر تو یہ بھی کئی بار لٹا ہے مجھ میں

جہاں جہاں کوئی اردو زبان بولتا ہے

وہیں وہیں مرا ہندوستان بولتا ہے

اپنی تعریف سنی ہے تو یہ سچ بھی سن لے

تجھ سے اچھا ترا کردار نہیں ہو سکتا

پہلے تو اس کی یاد نے سونے نہیں دیا

پھر اس کی آہٹوں نے کہا جاگتے رہو

جس صدی میں وفا کا چلن ہی نہیں

ہم بنائے گئے اس صدی کے لئے

جس کو بچائے رکھنے میں اجداد بک گئے

ہم نے اسی حویلی کو نیلام کر دیا

خوشبو سے کس زبان میں باتیں کریں گے لوگ

محفل میں یہ سوال تجھے دیکھ کر ہوا

یہ الگ بات کہ الفاظ ہیں میرے لیکن

سچ تو بس یہ ہے کہ تیری ہی صدا ہے مجھ میں

حالات کیا یہ تیرے بچھڑنے سے ہو گئے

لگتا ہے جیسے ہم کسی میلے میں کھو گئے

جو پھانس چبھ رہی ہے دلوں میں وہ تو نکال

جو پاؤں میں چبھی تھی اسے ہم نکال آئے

اس شہر میں چلتی ہے ہوا اور طرح کی

جرم اور طرح کے ہیں سزا اور طرح کی

ہم نے کچھ گیت لکھے ہیں جو سنانا ہیں تمہیں

تم کبھی بزم سجانا تو خبر کر دینا

شبنم کی جگہ آگ کی بارش ہو مگر ہم

منصورؔ نہ مانگیں گے دعا اور طرح کی

خوشبو کا قافلہ یہ بہاروں کا سلسلہ

پہنچا ہے شہر تک تو مرے گھر بھی آئے گا

خدا کے نام پہ کیا کیا فریب دیتے ہیں

زمانہ ساز یہ رہبر بھی میں بھی دنیا بھی

وقت ہوتا ہے بے وفا یارو

آدمی بے وفا نہیں ہوتا