laḌkā na koī phir se ho barbād dahr meñ

tujh par na jaa.eñ beTiyāñ terī ḳhudā kare

laDka na koi phir se ho barbaad dahr mein

tujh par na jaen beTiyan teri KHuda kare

mirī nigāh ko gar terī diid ho jaa.e

qasam ḳhudā kī mirī iid iid ho jaa.e

meri nigah ko gar teri did ho jae

qasam KHuda ki meri id id ho jae

bevafā.ī kī jab bhī baat chalī

bā-ḳhudā tum bahut hī yaad aa.e

bewafai ki jab bhi baat chali

ba-KHuda tum bahut hi yaad aae

zarūrī to nahīñ ye ki hileñ lab

ye ḳhāmoshī bhī to ik guftugū hai

zaruri to nahin ye ki hilen lab

ye KHamoshi bhi to ek guftugu hai

ik hī lamhe meñ samajh aatī nahīñ koī kitāb

umr lagtī hai kisī shaḳhs ko pahchānñe meñ

ek hi lamhe mein samajh aati nahin koi kitab

umr lagti hai kisi shaKHs ko pahchanne mein

aisī nīñdoñ se thak chukā huuñ maiñ

mujh ko nīñd-e-hameshgī de de

aisi nindon se thak chuka hun main

mujh ko nind-e-hameshgi de de

ik baar meñ hī tū mirā qissa tamām kar

qistoñ meñ kar rahā hai bhalā qatl kyoñ mujhe

ek bar mein hi tu mera qissa tamam kar

qiston mein kar raha hai bhala qatl kyon mujhe

kyoñ maiñ us husn ko hasīn kahūñ

jis kī zīnat hī be-hayā.ī ho

kyon main us husn ko hasin kahun

jis ki zinat hi be-hayai ho

baḌā hī farq hai ai yaar ham donoñ ke jazboñ meñ

tumheñ mujh se mohabbat thī mujhe tum se mohabbat hai

baDa hi farq hai ai yar hum donon ke jazbon mein

tumhein mujh se mohabbat thi mujhe tum se mohabbat hai

kuchh to insāf kar banī-ādam har nafī shai ko tū haqīr na jaan

tīrgī raushnī se pahle thī ḳhaar phūloñ se pahle aa.e haiñ

kuchh to insaf kar bani-adam har nafi shai ko tu haqir na jaan

tirgi raushni se pahle thi KHar phulon se pahle aae hain

kyoñ hayā ḳhud pe ro rahī hai 'suhail'

kyā kisī be-hayā ko dekhā hai

kyon haya KHud pe ro rahi hai 'suhail'

kya kisi be-haya ko dekha hai

ranj-o-ġham aur alam-o-dard kā lashkar nikle

ishq to tab hai jab āñkhoñ se samandar nikle

ranj-o-gham aur alam-o-dard ka lashkar nikle

ishq to tab hai jab aankhon se samandar nikle

jab vo haiñ bure to phir achchhā.ī kareñge kyoñ

ḳhushbū kī tamanna tum kyoñ karte ho ḳhāroñ se

jab wo hain bure to phir achchhai karenge kyon

KHushbu ki tamanna tum kyon karte ho KHaron se

misl-e-mausam jo badalte to koī baat na thī

tū ne to badlā hai girgiT kī tarah rang apnā

misl-e-mausam jo badalte to koi baat na thi

tu ne to badla hai girgiT ki tarah rang apna

gir ga.ī hai vo ik bulandī se

maiñ ne sar pe chaḌhā liyā thā use

gir gai hai wo ek bulandi se

main ne sar pe chaDha liya tha use

ki jis charāġh ko raushan kiyā thā maiñ ne kabhī

vahī charāġh mirā ghar jalāne aayā hai

ki jis charagh ko raushan kiya tha main ne kabhi

wahi charagh mera ghar jalane aaya hai

ik umr ho ga.ī hai use chāhte hue

ik umr se ye bār-e-garāñ Dho rahe haiñ ham

ek umr ho gai hai use chahte hue

ek umr se ye bar-e-garan Dho rahe hain hum

ishq pe ijtihād kar kar ke

mujtahid ho gayā huuñ maiñ ġham kā

ishq pe ijtihad kar kar ke

mujtahid ho gaya hun main gham ka

hone do agar ho ga.e kuchh log bure bhī

gulshan meñ agar phuul haiñ to ḳhaar bhī hoñge

hone do agar ho gae kuchh log bure bhi

gulshan mein agar phul hain to KHar bhi honge

nazar haiñ aa.ī baḌe arse baad aaj mujhe

vo āyateñ ki jo mansūḳh ho ga.ī thiiñ kabhī

nazar hain aai baDe arse baad aaj mujhe

wo aayaten ki jo mansuKH ho gai thin kabhi

aadam ke lāDle bhī kuchh kam nahīñ haiñ lekin

havvā kī beTiyoñ se allāh hī bachā.e

aadam ke laDle bhi kuchh kam nahin hain lekin

hawwa ki beTiyon se allah hi bachae

rāhoñ ke pattharoñ kā bhalā kyā gila karūñ

ab aadmī ke dil bhī to patthar ke ho ga.e

rahon ke pattharon ka bhala kya gila karun

ab aadmi ke dil bhi to patthar ke ho gae