guzashta saal bhī 'ashraf' yahī ummīd thī ham ko

ki ye jo saal aayā hai ḳhushī kī ghaḌiyāñ lā.egā

guzashta sal bhi 'ashraf' yahi ummid thi hum ko

ki ye jo sal aaya hai KHushi ki ghaDiyan laega

jab bhī chūmā hai tire hoñToñ ko

jism se un ko judā jaanā hai

jab bhi chuma hai tere honTon ko

jism se un ko juda jaana hai

tire hoñToñ kī surḳhī dekh kar to aisā lagtā hai

chabāyā hai kisī 'āshiq kā dil hinda-mizājī se

tere honTon ki surKHi dekh kar to aisa lagta hai

chabaya hai kisi 'ashiq ka dil hinda-mizaji se

tumhīñ ko chāheñge zindagī bhar kisī se ulfat nahīñ kareñge

jo kah diyā hai so kah diyā hai na.ī mohabbat nahīñ kareñge

tumhin ko chahenge zindagi bhar kisi se ulfat nahin karenge

jo kah diya hai so kah diya hai nai mohabbat nahin karenge

vahī sab log 'ashraf' āstīñ ke saañp nikle haiñ

jinheñ shāmil samajhte the tum apne ḳhair-ḳhvāhoñ meñ

wahi sab log 'ashraf' aastin ke sanp nikle hain

jinhen shamil samajhte the tum apne KHair-KHwahon mein