یہ سوچ کر وجود فراموش کر دیا

خود سے ملا تو تیری تمنا کروں گا میں

تلاش کرتا ہے ہر گام کارواں ہم کو

ہوائے دشت بلا لے گئی کہاں ہم کو

مجھ میں اب میری جگہ باقی نہیں

میں تری موجودگی سے بھر گیا

اس ایک لمحے میں اے دوست ساتھ ساتھ ہیں ہم

وہ ایک لمحہ جو امکان میں نہیں آیا

میں نہیں جانتا کہاں ہوں میں

ان دنوں خود سے رابطہ ہی نہیں

دیکھی ہے عمر بھر یہی بے چہرہ کائنات

دو چار پل وجود کے اندر ہی دیکھ لوں

اک عمر تیرے ساتھ چلا بھی تو کیا ملا

اب سوچتا ہوں تجھ سے بچھڑ کر ہی دیکھ لوں

زرد سے سبز ہوتا جاتا ہے

اک شجر انتظار سے نکلا

انگنت نقش بنا لیں گے یہ نقاش مگر

حسن مہتاب کا مہتاب میں رہ جائے گا

اپنے اندر جو بھری جست تو حیرانی ہوئی

اس کنویں میں سبھی کچھ میرے علاوہ نکلا

حسب معمول ایک موڑ پہ آج

دیر تک تیرا انتظار ہوا