talāsh kartā hai har gaam kārvāñ ham ko

havā-e-dasht bulā le ga.ī kahāñ ham ko

talash karta hai har gam karwan hum ko

hawa-e-dasht bula le gai kahan hum ko

ye soch kar vujūd farāmosh kar diyā

ḳhud se milā to terī tamanna karūñgā maiñ

ye soch kar wujud faramosh kar diya

KHud se mila to teri tamanna karunga main

apne andar jo bharī jast to hairānī huī

is kueñ meñ sabhī kuchh mere 'alāva niklā

apne andar jo bhari jast to hairani hui

is kuen mein sabhi kuchh mere 'alawa nikla

us ek lamhe meñ ai dost saath saath haiñ ham

vo ek lamha jo imkān meñ nahīñ aayā

us ek lamhe mein ai dost sath sath hain hum

wo ek lamha jo imkan mein nahin aaya

mujh meñ ab merī jagah baaqī nahīñ

maiñ tirī maujūdgī se bhar gayā

mujh mein ab meri jagah baqi nahin

main teri maujudgi se bhar gaya

zard se sabz hotā jaatā hai

ik shajar intizār se niklā

zard se sabz hota jata hai

ek shajar intizar se nikla

maiñ nahīñ jāntā kahāñ huuñ maiñ

in dinoñ ḳhud se rābta hī nahīñ

main nahin jaanta kahan hun main

in dinon KHud se rabta hi nahin

ik 'umr tere saath chalā bhī to kyā milā

ab sochtā huuñ tujh se bichhaḌ kar hī dekh luuñ

ek 'umr tere sath chala bhi to kya mila

ab sochta hun tujh se bichhaD kar hi dekh lun

dekhī hai 'umr bhar yahī be-chehra kā.enāt

do chaar pal vujūd ke andar hī dekh luuñ

dekhi hai 'umr bhar yahi be-chehra kaenat

do chaar pal wujud ke andar hi dekh lun

anginat naqsh banā leñge ye naqqāsh magar

husn mahtāb kā mahtāb meñ rah jā.egā

anginat naqsh bana lenge ye naqqash magar

husn mahtab ka mahtab mein rah jaega

hasb-e-mā'mūl ek moḌ pe aaj

der tak terā intizār huā

hasb-e-ma'mul ek moD pe aaj

der tak tera intizar hua