niiñd meñ bhī hai sharm chehre par

ḳhvāb meñ mujh se mil rahī ho kyā

nind mein bhi hai sharm chehre par

KHwab mein mujh se mil rahi ho kya

jab se dekhā hai us ke chehre ko

titliyāñ uḌ rahī haiñ āñkhoñ meñ

jab se dekha hai us ke chehre ko

titliyan uD rahi hain aankhon mein

ham tire hijr kī sabhī rāteñ

pī ke cigarette guzār dete haiñ

hum tere hijr ki sabhi raaten

pi ke cigarette guzar dete hain

merī āñkhoñ se dekhne vaale

us ko behad hasīn kahte haiñ

meri aankhon se dekhne wale

us ko behad hasin kahte hain

har ek baar vafāoñ pe zarb lagtī hai

har ek baar mirā pyaar haar jaatā hai

har ek bar wafaon pe zarb lagti hai

har ek bar mera pyar haar jata hai

kuchh āstīnoñ kī majbūriyāñ bhī hotī haiñ

ḳhushī se apnī bhalā saañp kaun pāltā hai

kuchh aastinon ki majburiyan bhi hoti hain

KHushi se apni bhala sanp kaun palta hai

kyā karte us se haath milā kar batā.iye

dil kaise miltā jis se tabī'at nahīñ milī

kya karte us se hath mila kar bataiye

dil kaise milta jis se tabi'at nahin mili

ye 'ishq jazba-e-rūhāniyat hai māntā huuñ

magar tū jism kī majbūriyāñ bhī samjhā kar

ye 'ishq jazba-e-ruhaniyat hai manta hun

magar tu jism ki majburiyan bhi samjha kar

vaqt ke saath husn Dhaltā hai

tum magar ab bhī ḳhūb-sūrat ho

waqt ke sath husn Dhalta hai

tum magar ab bhi KHub-surat ho

bad-sulūkī pe tirī ham se rivāyat ke amiin

ab tujhe lauT ke gaalī bhī nahīñ de sakte

bad-suluki pe teri hum se riwayat ke amin

ab tujhe lauT ke gali bhi nahin de sakte

apnī rusvā.iyoñ se kaise bacheñ

log aḳhbār bhī to paḌhte haiñ

apni ruswaiyon se kaise bachen

log aKHbar bhi to paDhte hain

merī nākāmiyāñ haiñ merī magar

merī shohrat meñ sab kā hissa hai

meri nakaamiyan hain meri magar

meri shohrat mein sab ka hissa hai

tujh ko haq hai tū dil dukhā merā

maiñ tujhe pyaar bhī to kartā huuñ

tujh ko haq hai tu dil dukha mera

main tujhe pyar bhi to karta hun

aap kī talḳhiyāñ bhī sah lūñgā

mujh ko 'ādat hai zahr piine kī

aap ki talKHiyan bhi sah lunga

mujh ko 'adat hai zahr pine ki

ḳhud-kushī bhī harām hai yā-rab

dil kī vahshat kā kyā 'ilāj karūñ

KHud-kushi bhi haram hai ya-rab

dil ki wahshat ka kya 'ilaj karun

zamīñ ke chehre pe ai ḳhuun malne vaalo suno

zamīñ hilī to tumheñ ḳhaak meñ milā degī

zamin ke chehre pe ai KHun malne walo suno

zamin hili to tumhein KHak mein mila degi

tum mire ḳhvāb meñ nahīñ aanā

TuuT jaate haiñ mere ḳhvāb sabhī

tum mere KHwab mein nahin aana

TuT jate hain mere KHwab sabhi

in samajh-dāroñ meñ koī to mirī baat sune

in samajh-dāroñ meñ ik shaḳhs to pāgal nikle

in samajh-daron mein koi to meri baat sune

in samajh-daron mein ek shaKHs to pagal nikle

vo mujh ko Dastā hai par zahr chhoḌtā hī nahīñ

lihāz rakhtā hai kuchh āstīñ meñ palne kā

wo mujh ko Dasta hai par zahr chhoDta hi nahin

lihaz rakhta hai kuchh aastin mein palne ka

jaane kyā hashr ho in mom-sifat logoñ kā

in dinoñ vaqt ke sūraj meñ tamāzat hai bahut

jaane kya hashr ho in mom-sifat logon ka

in dinon waqt ke suraj mein tamazat hai bahut

zulm kī ibtidā pe ḳhatm huī

zabt kī mere intihā āḳhir

zulm ki ibtida pe KHatm hui

zabt ki mere intiha aaKHir

pahle hañsne to do musībat par

phir ye socheñge kyā kiyā jaa.e

pahle hansne to do musibat par

phir ye sochenge kya kiya jae

is qadar e'tibār Thiik nahīñ

tum mujhe jāntī hī kitnā ho

is qadar e'tibar Thik nahin

tum mujhe jaanti hi kitna ho

merī ḳhātir vo kisī aur ko chhoḌ aayā hai

ab kisī aur kī ḳhātir vo mujhe chhoḌegā

meri KHatir wo kisi aur ko chhoD aaya hai

ab kisi aur ki KHatir wo mujhe chhoDega

jaane kyoñ hijr ke sabhī mausam

tere lahje meñ baat karte haiñ

jaane kyon hijr ke sabhi mausam

tere lahje mein baat karte hain

merī bīnā.ī chhīn lī jis ne

aap bhī vo hī ḳhvāb dekhte ho

meri binai chhin li jis ne

aap bhi wo hi KHwab dekhte ho

us ko dekho kabhī udāsī meñ

kis balā kī hasīn lagtī hai

us ko dekho kabhi udasi mein

kis bala ki hasin lagti hai

phir vahī zid ki dil ko samjhā lo

dil mirī baat māntā kab hai

phir wahi zid ki dil ko samjha lo

dil meri baat manta kab hai