aaj kyā jaane vo kyuuñ ārām-e-jāñ aayā nahīñ

harf-e-ranjish kal to koī darmiyāñ aayā nahīñ

aaj kya jaane wo kyun aaram-e-jaan aaya nahin

harf-e-ranjish kal to koi darmiyan aaya nahin

yahī to kufr hai yārān-e-be-ḳhudī ke huzūr

jo kufr-o-dīñ kā mire yaar imtiyāz rahā

yahi to kufr hai yaran-e-be-KHudi ke huzur

jo kufr-o-din ka mere yar imtiyaz raha

baiTh kar masjid meñ rindoñ se na itnā bigaḌiye

shaiḳh-jī aate ho maiḳhāne ke bhī akasr taraf

baiTh kar masjid mein rindon se na itna bigaDiye

shaiKH-ji aate ho maiKHane ke bhi akasr taraf

pākī-e-dāmān-e-gul kī khā na ai bulbul qasam

raat bhar sarshār-e-kaifiyyat maiñ shabnam se rahā

paki-e-daman-e-gul ki kha na ai bulbul qasam

raat bhar sarshaar-e-kaifiyyat main shabnam se raha

khul gayā ab ye ki vasl us kā ḳhayāl-e-ḳhām hai

aaj ummīdoñ kā dil hī dil meñ qatl-e-ām hai

khul gaya ab ye ki wasl us ka KHayal-e-KHam hai

aaj ummidon ka dil hi dil mein qatl-e-am hai