kyā ḳhabar kab qaid-e-bām-o-dar se uktā jaa.e dil

bastiyoñ ke darmiyāñ sahrā bhī honā chāhiye

kya KHabar kab qaid-e-baam-o-dar se ukta jae dil

bastiyon ke darmiyan sahra bhi hona chahiye

us ko dhuñdlā na sakegā kabhī lamhoñ kā ġhubār

merī hastī kā varaq yūñhī khulā rahne de

us ko dhundla na sakega kabhi lamhon ka ghubar

meri hasti ka waraq yunhi khula rahne de

bol kis moḌ pe huuñ kashmakash-e-marg-o-hayāt

aise aalam meñ kahāñ chhoḌ diyā hai mujh ko

bol kis moD pe hun kashmakash-e-marg-o-hayat

aise aalam mein kahan chhoD diya hai mujh ko

jo sāya-dār shajar the vo sarf-e-dār hue

dikhā.ī dete nahīñ duur duur tak saa.e

jo saya-dar shajar the wo sarf-e-dar hue

dikhai dete nahin dur dur tak sae

muddat guzrī Duub chukā huuñ dard kī pyāsī lahroñ meñ

zinda huuñ ye koī na jaane saañs ke aane jaane se

muddat guzri Dub chuka hun dard ki pyasi lahron mein

zinda hun ye koi na jaane sans ke aane jaane se