میری آنکھوں ہی میں تھے ان کہے پہلو اس کے

وہ جو اک بات سنی میری زبانی تم نے

میں تو ہر دھوپ میں سایوں کا رہا ہوں جویا

مجھ سے لکھوائی سرابوں کی کہانی تم نے

عبرت آباد بھی دل ہوتے ہیں انسانوں کے

داد ملتی بھی نہیں خوں شدہ ارمانوں کی

بستیاں کیسے نہ ممنون ہوں دیوانوں کی

وسعتیں ان میں وہی لاتے ہیں ویرانوں کی

کبھی فاصلوں کی مسافتوں پہ عبور ہو تو یہ کہہ سکوں

مرا جرم حسرت قرب ہے تو یہی کمی یہاں سب میں ہے

سحر ازل کو جو دی گئی وہی آج تک ہے مسافری

اے طے کریں تو پتہ چلے کہاں کون کس کی طلب میں ہے

کیا کیا پکاریں سسکتی دیکھیں لفظوں کے زندانوں میں

چپ ہی کی تلقین کرے ہے غیرت مند ضمیر ہمیں

پھیرا بہار کا تو برس دو برس میں ہے

یہ چال ہے خزاں کی جو رک رک کے تھم گئی

نور سحر کہاں ہے اگر شام غم گئی

کب التفات تھا کہ جو خوئے ستم گئی

جن خیالوں کے الٹ پھیر میں الجھیں سانسیں

ان میں کچھ اور بھی سانسوں کا اضافہ کر لیں

رات کے بعد وہ صبح کہاں ہے دن کے بعد وہ شام کہاں

جو آشفتہ سری ہے مقدر اس میں قید مقام کہاں