ab kisī se bhī shikāyat na rahī

jaane kis kis se gilā thā pahle

ab kisi se bhi shikayat na rahi

jaane kis kis se gila tha pahle

bahut mushkil hai banjāra-mizājī

salīqa chāhiye āvārgī meñ

bahut mushkil hai banjara-mizaji

saliqa chahiye aawargi mein

ġham ho ki ḳhushī donoñ kuchh duur ke sāthī haiñ

phir rasta hī rasta hai hañsnā hai na ronā hai

gham ho ki KHushi donon kuchh dur ke sathi hain

phir rasta hi rasta hai hansna hai na rona hai

sab kuchh to hai kyā DhūñDtī rahtī haiñ nigāheñ

kyā baat hai maiñ vaqt pe ghar kyuuñ nahīñ jaatā

sab kuchh to hai kya DhunDti rahti hain nigahen

kya baat hai main waqt pe ghar kyun nahin jata

safar meñ dhuup to hogī jo chal sako to chalo

sabhī haiñ bhiiḌ meñ tum bhī nikal sako to chalo

safar mein dhup to hogi jo chal sako to chalo

sabhi hain bhiD mein tum bhi nikal sako to chalo

nainoñ meñ thā rāsta hirdai meñ thā gaañv

huī na puurī yātrā chhalnī ho ga.e paañv

nainon mein tha rasta hirdai mein tha ganw

hui na puri yatra chhalni ho gae panw

naqsha le kar haath meñ bachcha hai hairān

kaise dīmak khā ga.ī us kā hindostān

naqsha le kar hath mein bachcha hai hairan

kaise dimak kha gai us ka hindostan

sab kī puujā ek sī alag alag har riit

masjid jaa.e maulvī koyal gaa.e giit

sab ki puja ek si alag alag har rit

masjid jae maulwi koyal gae git

us jaisā to dūsrā milnā thā dushvār

lekin us kī khoj meñ phail gayā sansār

us jaisa to dusra milna tha dushwar

lekin us ki khoj mein phail gaya sansar

vo suufī kā qaul ho yā panDit kā gyaan

jitnī biite aap par utnā hī sach maan

wo sufi ka qaul ho ya panDit ka gyan

jitni bite aap par utna hi sach man