bhuul jaane kā mujhe mashvara dene vaale

yaad ḳhud ko bhī na maiñ aa.uuñ kuchh aisā kar de

bhul jaane ka mujhe mashwara dene wale

yaad KHud ko bhi na main aaun kuchh aisa kar de

qānūn jaise kho chukā sadiyoñ kā e'timād

ab kaun dekhtā hai ḳhatā kā hai ruḳh kidhar

qanun jaise kho chuka sadiyon ka e'timad

ab kaun dekhta hai KHata ka hai ruKH kidhar

raat ke lamhāt ḳhūnī dāstāñ likhte rahe

sub.h ke aḳhbār meñ hālāt behtar ho ga.e

raat ke lamhat KHuni dastan likhte rahe

subh ke aKHbar mein haalat behtar ho gae

vo gulābī bādaloñ meñ ek niilī jhiil sī

hosh qaa.em kaise rahte thā hī kuchh aisā libās

wo gulabi baadalon mein ek nili jhil si

hosh qaem kaise rahte tha hi kuchh aisa libas

kuchh ehtiyāt parinde bhī rakhnā bhuul ga.e

kuchh intiqām bhī āñdhī ne badtarīn liye

kuchh ehtiyat parinde bhi rakhna bhul gae

kuchh intiqam bhi aandhi ne badtarin liye