apnā sach us ko sunāne ke liye

ham ko qissoñ kā havāla chāhiye

apna sach us ko sunane ke liye

hum ko qisson ka hawala chahiye

tah-ba-tah khultī hī rahtī hai sadā

'mīr' ke dīvān sī hai zindagī

tah-ba-tah khulti hi rahti hai sada

'mir' ke diwan si hai zindagi

vaqt badlā soch badlī baat badlī

ham se bachche kah rahe haiñ ham na.e haiñ

waqt badla soch badli baat badli

hum se bachche kah rahe hain hum nae hain

nayā chaar din meñ purānā huā

yahī sab huā to nayā kyā huā

naya chaar din mein purana hua

yahi sab hua to naya kya hua

ḳhālī dīvār burī lagtī hai

merī tasvīr hī rahne dete

KHali diwar buri lagti hai

meri taswir hi rahne dete

ham kitāboñ meñ jise paate haiñ 'hāris'

aadmī vaisā koī miltā kahāñ hai

hum kitabon mein jise pate hain 'haaris'

aadmi waisa koi milta kahan hai

sadā.eñ Dūbtī haiñ jab

ḳhamoshī muskurātī hai

sadaen Dubti hain jab

KHamoshi muskuraati hai

kholo na koī aib kisī kā bhī yahāñ par

aaseb ko mil jā.egā darvāza khulā sā

kholo na koi aib kisi ka bhi yahan par

aaseb ko mil jaega darwaza khula sa

inheñ aage nikal jaane do 'hāris'

balā.eñ kab se pīchhā kar rahī haiñ

inhen aage nikal jaane do 'haaris'

balaen kab se pichha kar rahi hain