ہمارا دل تو غم میں بھی خوشی محسوس کرتا ہے

وہی مشکل میں رہتے ہیں جو غم کو غم سمجھتے ہیں

خود تراشنا پتھر اور خدا بنا لینا

آدمی کو آتا ہے کیا سے کیا بنا لینا

زندگی کا بھی کیا بھروسا ہے

زندگی کی قسم بھی کیا کھاؤں

اے خدا میں سن رہا ہوں آہٹیں اس وقت کی

جب تری دنیا کا ہر بندا خدا ہو جائے گا

تمہاری راہ میں آنکھیں بچھائے بیٹھا ہوں

تمہارے آنے کی حالانکہ کوئی آس نہیں

تمہیں اے کاش کوئی راز یہ سمجھا گیا ہوتا

اگر سنتے تو کہنے کا سلیقہ آ گیا ہوتا

خوشی ہم سے کنارا کر رہی ہے

ہمیں غم کو بھی اپنانا پڑے گا

رہے خیال حقارت سے دیکھنے والو

حقیر لوگ بڑے آدمی نکلتے ہیں

رکھو تم بند بے شک اپنی گھڑیاں

سمے تو رات دن چلتا رہے گا

ہر شخص یہاں صاحب ادراک نہیں ہے

ہر شخص کو تم صاحب ادراک نہ کہنا

اب مجھے تھوڑی سی غفلت سے بھی ڈر لگتا ہے

آنکھ لگتی ہے کہ دیوار سے سر لگتا ہے

ہر اک کی ہے پسند اپنی ہر اک کا ہے مزاج اپنا

وفا مجھ کو پسند آئی پسند آئی جفا اس کو

ہم نے دنیا سے سلوک ایسا کیا ہے راناؔ

ہم نہ ہوں گے تو بہت یاد کرے گی دنیا

رکھنا ہمیشہ یاد یہ میرا کہا ہوا

آتا نہیں ہے لوٹ کے پانی بہا ہوا

مسئلے حل کرتے کرتے آدمی کا ذہن بھی

بے طرح الجھا ہوا اک مسئلہ ہو جائے گا

آج بار گوش ہے میری صدا اس کو مگر

میرے شعروں کو زمانہ دیر تک دہرائے گا