murjhā.e hue gul par ik buuñd hai shabnam kī

tā'bīr kī palkoñ par ik ḳhvāb kā aañsū hai

murjhae hue gul par ek bund hai shabnam ki

ta'bir ki palkon par ek KHwab ka aansu hai

ek dhaḌkā sā lagā rahtā hai ḳhush hone par

ye bahār ab ke na tamhīd-e-ḳhizāñ ho jaa.e

ek dhaDka sa laga rahta hai KHush hone par

ye bahaar ab ke na tamhid-e-KHizan ho jae

jalā charāġh-e-'adam to 'ajab ujālā huā

rāh-e-vujūd kī manzil dikhā.ī dene lagī

jala charagh-e-'adam to 'ajab ujala hua

rah-e-wujud ki manzil dikhai dene lagi

khiñchī huī thī koī aur naam kī rekhā

tumhāre haath pe taqdīr ne lagā.ī hinā

khinchi hui thi koi aur nam ki rekha

tumhaare hath pe taqdir ne lagai hina

tilismī chashm ne terī kiyā mujhe manzūr

aur ik gumān meñ Daalā ke koī ḳhvāb huuñ maiñ

tilismi chashm ne teri kiya mujhe manzur

aur ek guman mein Dala ke koi KHwab hun main

kaun ā.īna dekhtā hai miyāñ

sab ko apnā hī 'aks pyārā hai

kaun aaina dekhta hai miyan

sab ko apna hi 'aks pyara hai

jaane ḳhvāboñ kā kyā huā hogā

ek muddat se ham nahīñ so.e

jaane KHwabon ka kya hua hoga

ek muddat se hum nahin soe

kab huuñ āzād is muhīt se maiñ

sochtā huuñ ki sochtā kyoñ huuñ

kab hun aazad is muhit se main

sochta hun ki sochta kyon hun

be-karāñ dasht-e-tasavvur meñ bhaTakne ke nuqūsh

mauj-dar-mauj sarāboñ se ubharte hoñge

be-karan dasht-e-tasawwur mein bhaTakne ke nuqush

mauj-dar-mauj sarabon se ubharte honge

apnī zanjīr-e-pā ko dekhtā huuñ

us kī pāzeb yaad aatī hai

apni zanjir-e-pa ko dekhta hun

us ki pazeb yaad aati hai

saañs khīñcheñ to misra’-e-ūlā

saañs chheḌeñ to misra'-e-sānī

sans khinchen to misra’-e-ula

sans chheDen to misra'-e-sani

uThtī chalī ga.ī hai koī aur hī sadā

ik āh-e-sard thī ki dabī ki dabī rahī

uThti chali gai hai koi aur hi sada

ek aah-e-sard thi ki dabi ki dabi rahi

hai parda-e-falak meñ ye kaisā siyah shigāf

dekho to koī jhāñk rahā hai zamīn kī or

hai parda-e-falak mein ye kaisa siyah shigaf

dekho to koi jhank raha hai zamin ki or

himmat kahāñ se lā.ūñ ki tā'bīr kar sakūñ

kal raat ḳhvāb dekh rahā thā ki ḳhush huuñ maiñ

himmat kahan se laun ki ta'bir kar sakun

kal raat KHwab dekh raha tha ki KHush hun main

kyā us se bichhaḌte ki mile hī na the jis se

ik-tarfa mohabbat ke bhī haiñ zāviye kyā kyā

kya us se bichhaDte ki mile hi na the jis se

ik-tarfa mohabbat ke bhi hain zawiye kya kya

ham na aa.e junūñ ke bas meñ kabhī

ye garebāñ ḳhirad ne chaak kiyā

hum na aae junun ke bas mein kabhi

ye gareban KHirad ne chaak kiya

ham ko miTTī ke gharoñdoñ se 'ajab nisbat hai

apnā ābā.ī makāñ girte hue dekhā thā

hum ko miTTi ke gharondon se 'ajab nisbat hai

apna aabai makan girte hue dekha tha

kis tarah yaad kar rakhī hai ye baat

bhuul jā.eñge ek din 'asrār'

kis tarah yaad kar rakhi hai ye baat

bhul jaenge ek din 'asrar'

she'r-goī hai shaġhl-e-'aql miyāñ

dil kā goyā koī kalām nahīñ

she'r-goi hai shaghl-e-'aql miyan

dil ka goya koi kalam nahin

'aql kuchh kaam kī na thī 'asrār'

'ishq ne is ko Thiik Thaak kiyā

'aql kuchh kaam ki na thi 'asrar'

'ishq ne is ko Thik Thak kiya

vo ek harf jo us ke laboñ se ho guzrā

us ek harf meñ saarā suḳhan samāyā thā

wo ek harf jo us ke labon se ho guzra

us ek harf mein sara suKHan samaya tha

jalā hai dasht-e-tasavvur kahāñ kahāñ Tapkā

tumhārī chashm-e-ġhazālāñ se buuñd buuñd aañsū

jala hai dasht-e-tasawwur kahan kahan Tapka

tumhaari chashm-e-ghazalan se bund bund aansu

mahv haiñ hazrat-e-ḳhayāl apne

hāl-e-dil meñ murāqiba bāñdhe

mahw hain hazrat-e-KHayal apne

haal-e-dil mein muraqiba bandhe

aap ham se judā nahīñ hote

aap par iḳhtiyār hai koī

aap hum se juda nahin hote

aap par iKHtiyar hai koi

bāzār-e-lafz meñ liye kaasa ḳhayāl kā

phirte haiñ ham saḳhāvat-e-mā’nī ke shauq meñ

bazar-e-lafz mein liye kasa KHayal ka

phirte hain hum saKHawat-e-ma’ni ke shauq mein

maiñ tujh ko dast-e-haqīqat se chhū ke dekhūñgā

tū ek paikar-e-ḳhvāb-o-ḳhayāl hai jānāñ

main tujh ko dast-e-haqiqat se chhu ke dekhunga

tu ek paikar-e-KHwab-o-KHayal hai jaanan

chāñdnī surḳh sī dikhā.ī de

ye moharram kā chāñd hai 'asrār'

chandni surKH si dikhai de

ye moharram ka chand hai 'asrar'