jurm-e-mohabbat kī milī ham ko ye pādāsh

apne kāñdhe par chale le kar apnī laash

jurm-e-mohabbat ki mili hum ko ye padash

apne kandhe par chale le kar apni lash

āñgan ke ik peḌ kī ThanDī mīThī chhāñv

shahr meñ jaise aa gayā chal kar merā gaañv

aangan ke ek peD ki ThanDi miThi chhanw

shahr mein jaise aa gaya chal kar mera ganw

mere chāroñ or the tarah tarah ke log

phir bhī mujh ko lag gayā tanhā.ī kā rog

mere chaaron or the tarah tarah ke log

phir bhi mujh ko lag gaya tanhai ka rog

rāteñ jañgal kī tarah aur din registān

merī jīvan yātrā kaise ho āsān

raaten jangal ki tarah aur din registan

meri jiwan yatra kaise ho aasan

is se baḌh kar aur kyā rishtoñ par dushnām

bhaa.ī aayā pūchhne mujh se merā naam

is se baDh kar aur kya rishton par dushnam

bhai aaya puchhne mujh se mera nam

ḳhush-fahmī kī dhuup meñ raushan jhūTī aas

añdhiyāre meñ reñgtā har sach kā vishvās

KHush-fahmi ki dhup mein raushan jhuTi aas

andhiyare mein rengta har sach ka wishwas

maiñ ne jis kī aañkh se dekhe apne ḳhvāb

ab us kā ehsās bhī mere liye azaab

main ne jis ki aankh se dekhe apne KHwab

ab us ka ehsas bhi mere liye azab

mandir masjid toḌiye lekin rahe ḳhayāl

shīshe meñ vishvās ke paḌ jaa.e na baal

mandir masjid toDiye lekin rahe KHayal

shishe mein wishwas ke paD jae na baal

rafta rafta ghul ga.ī merī soch kī barf

ya.anī maiñ ḳhud ho gayā apne hāthoñ sarf

rafta rafta ghul gai meri soch ki barf

yani main KHud ho gaya apne hathon sarf

yādoñ ke sarmā.e par ḳhud se māñgūñ byaaj

yuuñ apnī tanhā.ī kā jashn manā.ūñ aaj

yaadon ke sarmae par KHud se mangun byaj

yun apni tanhai ka jashn manaun aaj

sūraj Duubā aur phir utre kaale saa.e

peḌoñ kī āvāz par panchhī vāpas aa.e

suraj Duba aur phir utre kale sae

peDon ki aawaz par panchhi wapas aae