tū nahīñ to tirā ḳhayāl sahī

koī to ham-ḳhayāl hai merā

tu nahin to tera KHayal sahi

koi to ham-KHayal hai mera

madrasa merā merī zaat meñ hai

ḳhud moallim huuñ ḳhud kitāb huuñ maiñ

madrasa mera meri zat mein hai

KHud moallim hun KHud kitab hun main

zindagī bhar mujhe is baat kī hasrat hī rahī

din guzārūñ to koī raat suhānī aa.e

zindagi bhar mujhe is baat ki hasrat hi rahi

din guzarun to koi raat suhani aae

dar-ba-dar hone se pahle kabhī sochā bhī na thā

ghar mujhe raas na aayā to kidhar jā.ūñgā

dar-ba-dar hone se pahle kabhi socha bhi na tha

ghar mujhe ras na aaya to kidhar jaunga

mujh ko kyā kyā na dukh mile 'sāqī'

mere apnoñ kī mehrbānī se

mujh ko kya kya na dukh mile 'saqi'

mere apnon ki mehrbani se

meñ ab tak din ke hañgāmoñ meñ gum thā

magar ab shaam hotī jā rahī hai

mein ab tak din ke hangamon mein gum tha

magar ab sham hoti ja rahi hai

ḳhvāb thā yā shabāb thā merā

do savāloñ kā ik javāb huuñ maiñ

KHwab tha ya shabab tha mera

do sawalon ka ek jawab hun main

kitne hī ġham nikharne lagte haiñ

ek lamhe kī shādmānī se

kitne hi gham nikharne lagte hain

ek lamhe ki shadmani se