ابھی روشن ہوا جاتا ہے رستہ

وہ دیکھو ایک عورت آ رہی ہے

جھوٹ میں شک کی کم گنجائش ہو سکتی ہے

سچ کو جب چاہو جھٹلایا جا سکتا ہے

عمر کا ایک اور سال گیا

وقت پھر ہم پہ خاک ڈال گیا

میں نے ہاتھوں سے بجھائی ہے دہکتی ہوئی آگ

اپنے بچے کے کھلونے کو بچانے کے لیے

شدید گرمی میں کیسے نکلے وہ پھول چہرہ

سو اپنے رستے میں دھوپ دیوار ہو رہی ہے

سب سے پہلے دل کے خالی پن کو بھرنا

پیسہ ساری عمر کمایا جا سکتا ہے

تمہارے بعد بڑا فرق آ گیا ہم میں

تمہارے بعد کسی پہ خفا نہیں ہوئے ہم

کوئی اسکول کی گھنٹی بجا دے

یہ بچہ مسکرانا چاہتا ہے

اگر ہمارے ہی دل میں ٹھکانا چاہئے تھا

تو پھر تجھے ذرا پہلے بتانا چاہئے تھا

کچھ لوگ ہیں جو جھیل رہے ہیں مصیبتیں

کچھ لوگ ہیں جو وقت سے پہلے بدل گئے

رشتوں کی دلدل سے کیسے نکلیں گے

ہر سازش کے پیچھے اپنے نکلیں گے

زندگی ایسے بھی حالات بنا دیتی ہے

لوگ سانسوں کا کفن اوڑھ کے مر جاتے ہیں

لوگ کہتے ہیں کہ اس کھیل میں سر جاتے ہیں

عشق میں اتنا خسارہ ہے تو گھر جاتے ہیں

سیاست کے چہرے پہ رونق نہیں

یہ عورت ہمیشہ کی بیمار ہے

اپنے خون سے اتنی تو امیدیں ہیں

اپنے بچے بھیڑ سے آگے نکلیں گے

موت کو ہم نے کبھی کچھ نہیں سمجھا مگر آج

اپنے بچوں کی طرف دیکھ کے ڈر جاتے ہیں

اک بیمار وصیت کرنے والا ہے

رشتے ناطے جیبھ نکالے بیٹھے ہیں

غم کے پیچھے مارے مارے پھرنا کیا

یہ دولت تو گھر بیٹھے آ جاتی ہے

مسئلہ ختم ہوا چاہتا ہے

دل بس اب زخم نیا چاہتا ہے

ہو گئی ہے مری اجڑی ہوئی دنیا آباد

میں اسے ڈھونڈ رہا ہوں یہ بتانے کے لیے

ہر کونے سے تیری خوشبو آئے گی

ہر صندوق میں تیرے کپڑے نکلیں گے

کن زمینوں پہ اتارو گے امداد کا قہر

کون سا شہر اجاڑو گے بسانے کے لیے

سفر سے لوٹ جانا چاہتا ہے

پرندہ آشیانہ چاہتا ہے