اک عمر تک میں اس کی ضرورت بنا رہا

پھر یوں ہوا کہ اس کی ضرورت بدل گئی

بدلا جو وقت گہری رفاقت بدل گئی

سورج ڈھلا تو سائے کی صورت بدل گئی

ہمارے پاس سنانے کو کچھ نہیں فہمیؔ

ہمیں تو خواب بھی دیکھے ہوئے زمانہ ہوا

ذرا شاداب ہونا چاہتے ہیں

ہمیں رونے دو رونا چاہتے ہیں

کہانی کو سمیٹو جلد فہمیؔ

تھکے ہیں لوگ سونا چاہتے ہیں

آخری بس ہے اور نکلنے والی ہے

آ جاؤ اک سیٹ برابر خالی ہے

وہ ایک شخص کسی طور جو مرا نہ ہوا

مری بلا سے کسی کا ہوا ہوا نہ ہوا

اسی لئے مجھے رستے میں شام آئی ہے

میں اپنی سمت بڑی دیر سے روانہ ہوا

لوگ اب اس طرح ڈرے ہوئے ہیں

آنکھ خالی ہے دل بھرے ہوئے ہیں

دھیان میں کوئی چہرہ لا کر مرضی کا

آنکھیں بن لیتی ہیں منظر مرضی کا

شہر کی حالت اتنی بھی مخدوش نہیں

دیکھو میں نے آج بھی جان بچا لی ہے

دھوپ گھڑے سے لے گئی سارے پانی کو

کوا ڈھونڈھتا رہ گیا کنکر مرضی کا

ہم دیے ہیں ہوا کے رستے میں

اور ترتیب سے دھرے ہوئے ہیں