iz.hār-e-ishq us se na karnā thā 'sheftā'

ye kyā kiyā ki dost ko dushman banā diyā

izhaar-e-ishq us se na karna tha 'shefta'

ye kya kiya ki dost ko dushman bana diya

fasāne yuuñ to mohabbat ke sach haiñ par kuchh kuchh

baḌhā bhī dete haiñ ham zeb-e-dāstāñ ke liye

fasane yun to mohabbat ke sach hain par kuchh kuchh

baDha bhi dete hain hum zeb-e-dastan ke liye

itnī na baḌhā pākī-e-dāmāñ kī hikāyat

dāman ko zarā dekh zarā band-e-qabā dekh

itni na baDha paki-e-daman ki hikayat

daman ko zara dekh zara band-e-qaba dekh

ham tālib-e-shohrat haiñ hameñ nañg se kyā kaam

badnām agar hoñge to kyā naam na hogā

hum talib-e-shohrat hain hamein nang se kya kaam

badnam agar honge to kya nam na hoga

jis lab ke ġhair bose leñ us lab se 'sheftā'

kambaḳht gāliyāñ bhī nahīñ mere vāste

jis lab ke ghair bose len us lab se 'shefta'

kambaKHt galiyan bhi nahin mere waste

shāyad isī kā naam mohabbat hai 'sheftā'

ik aag sī hai siine ke andar lagī huī

shayad isi ka nam mohabbat hai 'shefta'

ek aag si hai sine ke andar lagi hui

hazār daam se niklā huuñ ek jumbish meñ

jise ġhurūr ho aa.e kare shikār mujhe

hazar dam se nikla hun ek jumbish mein

jise ghurur ho aae kare shikar mujhe

be-uzr vo kar lete haiñ va.ada ye samajh kar

ye ahl-e-muravvat haiñ taqāzā na kareñge

be-uzr wo kar lete hain wada ye samajh kar

ye ahl-e-murawwat hain taqaza na karenge

kis liye lutf kī bāteñ haiñ phir

kyā koī aur sitam yaad aayā

kis liye lutf ki baaten hain phir

kya koi aur sitam yaad aaya

āshufta-ḳhātirī vo balā hai ki 'sheftā'

taa.at meñ kuchh maza hai na lazzat gunāh meñ

aashufta-KHatiri wo bala hai ki 'shefta'

taat mein kuchh maza hai na lazzat gunah mein

uḌtī sī 'sheftā' kī ḳhabar kuchh sunī hai aaj

lekin ḳhudā kare ye ḳhabar mo'tabar na ho

uDti si 'shefta' ki KHabar kuchh suni hai aaj

lekin KHuda kare ye KHabar mo'tabar na ho

ai tāb-e-barq thoḌī sī taklīf aur bhī

kuchh rah ga.e haiñ ḳhār-o-ḳhas-e-āshiyāñ hanūz

ai tab-e-barq thoDi si taklif aur bhi

kuchh rah gae hain KHar-o-KHas-e-ashiyan hanuz

dil-e-bad-ḳhū kī kisī tarah ra.ūnat kam ho

chāhtā huuñ vo sanam jis meñ mohabbat kam ho

dil-e-bad-KHu ki kisi tarah raunat kam ho

chahta hun wo sanam jis mein mohabbat kam ho

shab vasl kī bhī chain se kyūñkar basar kareñ

jab yuuñ nigāhbānī murġh-e-sahar kareñ

shab wasl ki bhi chain se kyunkar basar karen

jab yun nigahbani murgh-e-sahar karen

kis tajāhul se vo kahtā hai kahāñ rahte ho

tere kūche meñ sitamgār tire kūche meñ

kis tajahul se wo kahta hai kahan rahte ho

tere kuche mein sitamgar tere kuche mein