ye baazī mohabbat kī baazī hai nādāñ

ise jītnā hai to haare chalā jā

ye bazi mohabbat ki bazi hai nadan

ise jitna hai to haare chala ja

barābar ḳhafā hoñ barābar manā.eñ

na tum baaz aao na ham baaz aa.eñ

barabar KHafa hon barabar manaen

na tum baz aao na hum baz aaen

sunñe meñ aa rahe haiñ masarrat ke vāqi.āt

jamhūriyat kā husn numāyāñ hai āj-kal

sunne mein aa rahe hain masarrat ke waqiat

jamhuriyat ka husn numayan hai aaj-kal

mohabbat ma.anī o alfāz meñ laa.ī nahīñ jaatī

ye vo nāzuk haqīqat hai jo samjhā.ī nahīñ jaatī

mohabbat mani o alfaz mein lai nahin jati

ye wo nazuk haqiqat hai jo samjhai nahin jati

qayāmat hai ye kah kar us ne lauTāyā hai qāsid ko

ki un kā to har ik ḳhat āḳhirī paiġhām hotā hai

qayamat hai ye kah kar us ne lauTaya hai qasid ko

ki un ka to har ek KHat aaKHiri paigham hota hai