patthar to hazāroñ ne maare the mujhe lekin

jo dil pe lagā aa kar ik dost ne maarā hai

patthar to hazaron ne mare the mujhe lekin

jo dil pe laga aa kar ek dost ne mara hai

terī be-pardagī hī husn kā parda niklī

kaam kuchh kar ga.ī har haal meñ ġhaflat merī

teri be-pardagi hi husn ka parda nikli

kaam kuchh kar gai har haal mein ghaflat meri

koī mahfil se uTh kar jā rahā hai

sambhal ai dil burā vaqt aa rahā hai

koi mahfil se uTh kar ja raha hai

sambhal ai dil bura waqt aa raha hai

tamannāoñ kī duniyā dil meñ ham ābād karte haiñ

ġhazab hai apne hāthoñ zindagī barbād karte haiñ

tamannaon ki duniya dil mein hum aabaad karte hain

ghazab hai apne hathon zindagi barbaad karte hain

kyā ġham hai jo ham gumnām rahe tum to na magar badnām hue

achchhā hai ki mere marne par duniyā meñ mirā mātam na huā

kya gham hai jo hum gumnam rahe tum to na magar badnam hue

achchha hai ki mere marne par duniya mein mera matam na hua

'suhail' un dostoñ kā jī lage kis tarah college meñ

jo dars-e-shauq lete haiñ kitāb-e-rū-e-jānāñ se

'suhail' un doston ka ji lage kis tarah college mein

jo dars-e-shauq lete hain kitab-e-ru-e-jaanan se

kyā lutf hai aise jiine kā jis kī na kisī ko parvā ho

kis kaam kā marnā vo marnā jis kā ki kisī ko ġham na huā

kya lutf hai aise jine ka jis ki na kisi ko parwa ho

kis kaam ka marna wo marna jis ka ki kisi ko gham na hua

vo rāteñ kaif meñ Duubī vo terī pyaar kī bāteñ

nikal paḌte haiñ aañsū jab kabhī ham yaad karte haiñ

wo raaten kaif mein Dubi wo teri pyar ki baaten

nikal paDte hain aansu jab kabhi hum yaad karte hain

siina figār chāk-garebāñ kafan-ba-dosh

aa.e haiñ terī bazm meñ is bāñkpan se ham

sina figar chaak-gareban kafan-ba-dosh

aae hain teri bazm mein is bankpan se hum

vo kaun dil hai jahāñ meñ kah duuñ jise ki ye aap kā nahīñ hai

ġhazab to ye hai ki merā dil hai magar mirā ham-navā nahīñ hai

wo kaun dil hai jahan mein kah dun jise ki ye aap ka nahin hai

ghazab to ye hai ki mera dil hai magar mera ham-nawa nahin hai

jañgal meñ ga.e gulshan meñ ga.e bastī meñ ga.e sahrā meñ ga.e

har tarah se bahlāyā dil ko par dil kā dhḌaknā kam na huā

jangal mein gae gulshan mein gae basti mein gae sahra mein gae

har tarah se bahlaya dil ko par dil ka dhDakna kam na hua

vo lamha ziist kā la.anat hai aadmī ke liye

jhuke jo sar kahīñ iz.hār-e-bandagī ke liye

wo lamha zist ka lanat hai aadmi ke liye

jhuke jo sar kahin izhaar-e-bandagi ke liye

ai hasrat-e-dil go vasl huā par shauq hamārā kam na huā

jis se ki ḳhalish kuchh aur baḌhe vo zaḳhm huā marham na huā

ai hasrat-e-dil go wasl hua par shauq hamara kam na hua

jis se ki KHalish kuchh aur baDhe wo zaKHm hua marham na hua

hai ye matlab gardish-e-ayyām kā

parda rakh le koshish-e-nākām kā

hai ye matlab gardish-e-ayyam ka

parda rakh le koshish-e-nakaam ka

dimāġh ko kar rahā huuñ raushan maiñ dāġh-e-dil ke jalā rahā huuñ

ab apnī tārīk zindagī kā nayā sarāpā banā rahā huuñ

dimagh ko kar raha hun raushan main dagh-e-dil ke jala raha hun

ab apni tarik zindagi ka naya sarapa bana raha hun

ḳhaak uchhālo jo zamīñ par to falak par gir jaa.e

ab khulā ye ki bahut past hai himmat merī

KHak uchhaalo jo zamin par to falak par gir jae

ab khula ye ki bahut past hai himmat meri

al-madad ai jazba-e-zauq-e-mohabbat al-madad

ishq ne āvāz dī be-iḳhtiyārāna mujhe

al-madad ai jazba-e-zauq-e-mohabbat al-madad

ishq ne aawaz di be-iKHtiyarana mujhe

har vaqt kī āh-o-zārī se dam bhar to zarā miltī fursat

ronā hī muqaddar thā merā to kis liye maiñ shabnam na huā

har waqt ki aah-o-zari se dam bhar to zara milti fursat

rona hi muqaddar tha mera to kis liye main shabnam na hua

dekhiye dekhiye hai banda-e-be-dām 'suhail'

nigah-e-nargis-e-maḳhmūr hai qīmat merī

dekhiye dekhiye hai banda-e-be-dam 'suhail'

nigah-e-nargis-e-maKHmur hai qimat meri